Рим папаси Лев XIV Ғазога уюштирилаётган ҳужумларни “варварлик”ка қиёслади. Бу ҳақда The Guardian хабар берди.
Папа бу фикрларини секторда 73 нафар фаластинлик гуманитар ёрдам марказларида ҳалок бўлганидан кейин баён қилган. Ғазо ССВ 20 июль куни қурбонлар турли жойларда, асосан, сектор шимолида ҳалок бўлганини маълум қилган. Таъкидланишича, қурбонларнинг 67 нафари БМТ ёрдам машиналарини кутиш чоғида Исроил ҳарбийлари томонидан отиб ўлдирилган.
БМТ Жаҳон озиқ-овқат дастурининг маълум қилишича, гуманитар ёрдам ортилган 25 та юк машинаси секторга кириши билан оломон томонидан қуршаб олинган. Шундан сўнг улар ўққа тутилган.
Аш-Шифо шифохонаси директори Муҳаммад Абу Салмия 20 июль куни БМТ юк машиналаридан ёрдам олишга уринган 48 киши ҳалок бўлганини ва яна 150 киши яраланганини билдирган.
Ушбу хабарлар пайдо бўлиши билан Римдаги ёзги қароргоҳида ибодат қилаётган Папа ҳодисага дарҳол муносабат билдирган. Хусусан, у “ваҳший урушни зудлик билан тугатишга ва можарони тинч йўл билан ҳал қилишга” чақирган.
Шунингдек, Рим папаси Исроилнинг Ғазодаги ягона католик черковига яқинда берган зарбасини ҳам қоралаган. Ҳодисада 3 киши ҳалок бўлиб, яна 10 киши жароҳатланган эди. Жароҳатланганлар орасида марҳум Рим папаси Франциск билан яқин алоқада бўлган руҳоний ҳам бўлган.
“Мен халқаро ҳамжамиятни гуманитар ҳуқуқни ва тинч аҳолини ҳимоя қилишга чақираман. Шунингдек, аҳолини мажбуран кўчиришга қаршиман”, деган Папа.
Изоҳ (0)