Netflix бош директори Тед Сарандоснинг сўзларига кўра, сунъий интеллект (СИ) кино саноатида инқилобий ўзгаришлар яратиши мумкин. У нафақат ишлаб чиқариш харажатларини камайтиради, балки режиссёр ва ижодкорларга визуал контентни янада бой ва қизиқарли тарзда намойиш этиш имконини беради. Сарандос бу ҳақда The Hollywood Reporter нашрига берган интервьюсида сўзлаб берди.
Netflix раҳбарининг таъкидлашича, СИ технологияси одамларнинг ўрнини эгалламайди, балки уларга ижодий иш жараёнларида ёрдам беради. Шунингдек, бундай илғор воситалардан фойдаланиш ижодкорларга фильмлар ва сериалларни нафақат тезроқ ва арзонроқ суратга олиш, балки уларнинг бадиий даражасини ҳам ошириш имконини беради.
Мисол сифатида, Сарандос “Этернавт” номли аргентиналик режиссёрлар томонидан яратилган паст бюджетли фантастик сериални тилга олди. Ушбу лойиҳада сунъий интеллект технологиялари кенг қўлланган. Жумладан, Буэнос Айресдаги бинонинг вайрон бўлиши саҳнаси тўлиқ генератив СИ ёрдамида яратилган. Натижада бу саҳна анъанавий усулларга нисбатан ўн баробар тезроқ тайёрланган. Сарандос бу ёндашув ижодий жамоанинг самарадорлигини ошириб, уларга вақт ва маблағни тежаш имконини берганини таъкидлади.
“Этернавт” Netflix тарихида генератив СИ кенг қўлланган илк сериаллардан бири сифатида ҳам қайд этилди. Яратилган визуал эффектлар томошабинлар ва мутахассислар томонидан илиқ кутиб олинди, бу эса келажакда бундай технологиялар кенгроқ қўлланишига йўл очади.
Netflix раҳбарининг фикрича, СИ воситалари ҳикоя қилиш имкониятларини кенгайтириб, режиссёр ва сценарий муаллифлари учун янги, илгари имконсиз бўлган воситаларини тақдим этади:
“Бу технологиялар инсонлар ижодини чекламайди, аксинча уни янги босқичга олиб чиқади. Натижада томошабин янада сифатли маҳсулотни томоша қилади”, дейди у.
Кино саноатида СИ технологияларидан фойдаланиш тенденцияси сўнгги йилларда сезиларли даражада кучайган. Превизуализация (олдиндан тасвирий лойиҳалаш), сценарий таҳлили, актёрлар ҳаракати ва мимикасини сунъий равишда яратиш, ҳатто овозларни генерация қилиш каби жараёнларда сунъий интеллект аллақачон амалиётга татбиқ этила бошланди. Айниқса, кичик бюджетли студиялар учун бу воситалар кинони “катта экран” даражасига олиб чиқиш учун муҳим пойдевор бўлмоқда.
Изоҳ (0)