Ўзбекистонда ичимлик ва оқова сув хизматлари бўйича истеъмолчиларнинг дебитор қарздорликлари маълум қилинди.
Хабар қилинишича, ичимлик ва оқова сув хизматлари бўйича истеъмолчиларнинг дебитор қарздорликлари 794 млрд сўмни (аҳоли 577,5 млрд сўм, юридик истеъмолчилар 216,6 млрд сўм) ташкил этди. Жорий 2025 йилининг ўтган даври мобайнида аҳолини марказлашган ичимлик суви билан таъминлаш борасида амалга оширилган ишлар натижасида аҳолининг таъминот даражаси 81,5 фоизга етди.
2025 йилда республика бюджетидан ажратилган маблағлар доирасида 1 июль ҳолатига 544 км ичимлик, 148 км оқова сув тармоқлари ва 35 та ичимлик, 7 та оқова сув иншоотларни қурилди. Аҳоли орасида олиб борилган тарғибот-ташвиқот ишлари ҳамда тарифларни қайта кўриб чиқилиши натижасида сув ҳисоблагичлари билан таъминланган истеъмолчилар сони 248,9 мингтага ёки 6 фоизга оширилиб, натижада истеъмолчиларнинг сув ҳисоблагичлари билан таъминланганлик даражаси 82 фоизга етказилди.
2025 йилнинг 1-ярим йиллигида тизимларда аниқланган 4 935 та носозлик бартараф этилиб, ўтган йилнинг мос даврига нисбатан қарийб 10 фоизга ёки 362 тага камайтирилишига эришилди.
Сенат Ўзбекистонда ичимлик сувининг 90 фоизи қишлоқ хўжалигига сарфланишини хабар қилганди. Жаҳон банки вакили эса республикада қарийб 7 миллион кишига ичимлик суви етиб бормаслигини айтган.
“Ўзсувтаъминот” АЖ раис ўринбосари айтишича, аҳолини ичимлик суви билан таъминлаш бўйича ўнлаб лойиҳалар амалга оширилмоқда.
“Биз 2030 йилгача сув секторини ривожлантириш бўйича стратегия ишлаб чиққанмиз. Ҳужжатда мамлакатда ичимлик суви билан қамровни 95 фоизга етказиш белгиланган. Ҳозирги кўрсаткич 80 фоиз. Яъни келгуси 5 йилда сув билан таъминлаш кўрсаткичини 15 фоизга ошириш жуда катта мақсадимиз ҳисобланади.
Ўзбекистондаги умумий сувнинг 4 фоизи ичимлик учун фойдаланилади. Биз ҳозирда сув таъминоти бўйича жами қиймати 2 миллиард долларлик 20 та катта инвестицион лойиҳаларни амалга оширяпмиз. Яна 15 га яқин янги лойиҳалар тайёрланяпти. Уларнинг қиймати ҳам 2 миллиард долларга яқинлашади. Биз 2040 йилгача жами 4 миллиард долларлик лойиҳаларни амалга оширмоқчимиз”, деди Хуршид Раҳматуллаев.
Изоҳ (0)