Республикада қарийб 7 миллион кишига ичимлик суви етиб бормайди. Бу ҳақда жорий йил 11 июнь куни ўтказилган “Тошкент халқаро инвестиция” форумида Жаҳон банкининг сув таъминоти ва оқова тизими бўйича катта мутахассиси Одете Муҳимпуа айтиб ўтди.
Одете Муҳимпуа ўрганишларига кўра, мамлакатда сув билан боғлиқ инфратузилмалар етарли эмас.
“Ўзбекистонда 7 миллион одам ҳали ҳам тоза ичимлик сувига эга эмас. Оқава сувларнинг учдан бир қисмигина қайта ишланади. Чунки қайта ишлайдиган корхоналар етарли эмас. Муаммо фақатгина сув билан боғлиқ бўлмай, пул етишмаслиги ҳам муҳим омилдир. Сув таъминоти ҳажмини ошириш учун халқаро молия институтлари ва бошқа ташкилотлар билан ҳамкорликни кучайтириш зарур. Фақатгина давлат молиялаштириши барча муаммони ҳал қила олмайди. Жаҳон банки Ўзбекистонда сув, ирригация ва сув ресурсларини бошқариш тармоқларига 700 млн доллар инвестиция йўналтирган”, деди мутахассис.
Муҳокамада “Ўзсувтаъминот” АЖ раис ўринбосари Хуршид Раҳматуллаев ҳам иштирок этган. Ташкилот расмийсининг айтишича, аҳолини ичимлик суви билан таъминлаш бўйича ўнлаб лойиҳалар амалга оширилмоқда.
“Биз 2030 йилгача сув секторини ривожлантириш бўйича стратегия ишлаб чиққанмиз. Ҳужжатда мамлакатда ичимлик суви билан қамровни 95 фоизга етказиш белгиланган. Ҳозирги кўрсаткич 80 фоиз. Яъни келгуси 5 йилда сув билан таъминлаш кўрсаткичини 15 фоизга ошириш жуда катта мақсадимиз ҳисобланади.
Ўзбекистондаги умумий сувнинг 4 фоизи ичимлик учун фойдаланилади. Биз ҳозирда сув таъминоти бўйича жами қиймати 2 миллиард долларлик 20 та катта инвестицион лойиҳаларни амалга оширяпмиз. Яна 15 га яқин янги лойиҳалар тайёрланяпти. Уларнинг қиймати ҳам 2 миллиард долларга яқинлашади. Биз 2040 йилгача жами 4 миллиард долларлик лойиҳаларни амалга оширмоқчимиз”, деди Хуршид Раҳматуллаев.
Аввалроқ Сенат Ўзбекистонда ичимлик сувининг 90 фоизи қишлоқ хўжалигига сарфланишини хабар қилганди.
Маълумот учун, 2025 йил 1 апрель куни Ўзбекистоннинг доимий аҳоли сони 37,7 миллион кишидан ошган.
Изоҳ (0)