O‘zbekistonda olinadigan chuchuk (ichimlik) suvning qariyb 90 foizi qishloq xo‘jaligida foydalanilib, har gektarga suv sarfi texnologik ilg‘or davlatlarga nisbatan 2—2,5 barobar ko‘p. Bu haqda Oliy Majlis Senati kengashining navbatdagi majlisida maʼlum qilindi.
Senat axborot xizmati xabariga ko‘ra, yig‘ilishda muhokama qilingan masalalardan biri suv resurslaridan oqilona foydalanish to‘g‘risida bo‘lgan.
Majlisda suv resurslaridan tejamli foydalanish sohasida amalga oshirilgan ishlar natijasida respublikada suv sarfi o‘tgan asrning 90-yillariga nisbatan yiliga 64 milliard kub metrdan hozirgi kunda o‘rtacha 51 milliard kub metrgacha kamaytirilgani aytilgan. Shu bilan birga, muloqotda avvallari har bir gektar sug‘oriladigan maydonga o‘rtacha 16 ming kub metr suv ishlatilgan bo‘lsa, hozirda bu ko‘rsatkich 10 ming kub metrgacha tushirilgani ham taʼkidlangan.
“Biroq erishilgan ijobiy natijalar bilan birga, sohada hal qilinishi lozim bo‘lgan qator muammolar saqlanib qolmoqda. Jumladan, mamlakatimizda olinadigan chuchuk suvning qariyb 90 foizi qishloq xo‘jaligida foydalanilib, har gektarga suv sarfi texnologik ilg‘or davlatlarga nisbatan 2—2,5 barobar ko‘p. Irrigatsiya tizimlaridagi nosozliklar tufayli ekin maydonlariga suv yetkazib berishda sezilarli yo‘qotishlar mavjud”, — deyiladi manba xabarida.
Eslatib o‘tamiz, 4—5-avgust kunlari Senatning 43-yalpi majlisi bo‘lib o‘tadi. Majlisda gidrotexnika inshootlari, sud, advokatura, volontyorlik, hayvonot dunyosini muhofaza qilish, veterinariya va boshqa masalalarga oid qonunlar ko‘rib chiqiladi.
Izoh (0)