Respublikada qariyb 7 million kishiga ichimlik suvi yetib bormaydi. Bu haqda joriy yil 11-iyun kuni o‘tkazilgan “Toshkent xalqaro investitsiya” forumida Jahon bankining suv taʼminoti va oqova tizimi bo‘yicha katta mutaxassisi Odete Muhimpua aytib o‘tdi.
Odete Muhimpua o‘rganishlariga ko‘ra, mamlakatda suv bilan bog‘liq infratuzilmalar yetarli emas.
“O‘zbekistonda 7 million odam hali ham toza ichimlik suviga ega emas. Oqava suvlarning uchdan bir qismigina qayta ishlanadi. Chunki qayta ishlaydigan korxonalar yetarli emas. Muammo faqatgina suv bilan bog‘liq bo‘lmay, pul yetishmasligi ham muhim omildir. Suv taʼminoti hajmini oshirish uchun xalqaro moliya institutlari va boshqa tashkilotlar bilan hamkorlikni kuchaytirish zarur. Faqatgina davlat moliyalashtirishi barcha muammoni hal qila olmaydi. Jahon banki O‘zbekistonda suv, irrigatsiya va suv resurslarini boshqarish tarmoqlariga 700 mln dollar investitsiya yo‘naltirgan”, dedi mutaxassis.
Muhokamada “O‘zsuvtaʼminot” AJ rais o‘rinbosari Xurshid Rahmatullayev ham ishtirok etgan. Tashkilot rasmiysining aytishicha, aholini ichimlik suvi bilan taʼminlash bo‘yicha o‘nlab loyihalar amalga oshirilmoqda.
“Biz 2030-yilgacha suv sektorini rivojlantirish bo‘yicha strategiya ishlab chiqqanmiz. Hujjatda mamlakatda ichimlik suvi bilan qamrovni 95 foizga yetkazish belgilangan. Hozirgi ko‘rsatkich 80 foiz. Yaʼni kelgusi 5 yilda suv bilan taʼminlash ko‘rsatkichini 15 foizga oshirish juda katta maqsadimiz hisoblanadi.
O‘zbekistondagi umumiy suvning 4 foizi ichimlik uchun foydalaniladi. Biz hozirda suv taʼminoti bo‘yicha jami qiymati 2 milliard dollarlik 20 ta katta investitsion loyihalarni amalga oshiryapmiz. Yana 15 ga yaqin yangi loyihalar tayyorlanyapti. Ularning qiymati ham 2 milliard dollarga yaqinlashadi. Biz 2040-yilgacha jami 4 milliard dollarlik loyihalarni amalga oshirmoqchimiz”, dedi Xurshid Rahmatullayev.
Avvalroq Senat O‘zbekistonda ichimlik suvining 90 foizi qishloq xo‘jaligiga sarflanishini xabar qilgandi.
Ma’lumot uchun, 2025-yil 1-aprel kuni O‘zbekistonning doimiy aholi soni 37,7 million kishidan oshgan.
Izoh (0)