“Ан-Насср” жамоаси ва Португалия терма жамоаси ҳужумчиси Криштиану Роналду Испаниянинг “Валенсия” клубини сотиб олиши мумкин.
Х ижтимоий тармоғидаги ТCР саҳифасининг ёзишича, Роналду испан клубини харид қилишни хоҳламоқда. У бундай катта харид учун ўзига шерик сифатида Саудия Арабистони валиаҳд шаҳзодаси Муҳаммад бин Салмонни танлаган.
Қироллик оиласи вакили ушбу битимнинг молиявий томонини назорат қилади ва Роналдунинг расмий ҳамкори бўлади. Маълумот ўрнида, ушбу инвесторнинг жамғармаси ҳозирда Англиянинг “Ньюкасл” клуби акцияларига ҳам эгалик қилади.
Ҳозирда “Валенсия”га сингапурлик бизнесмен Петер Лим Энг Ҳок эгалик қилади. У 2014 йилда испан жамоасини харид қилган эди.
“Валенсия” Испаниянинг энг совриндор клубларидан бири ҳисобланади. Клуб шу вақтга қадар Ла Лигада 6 марта, Испания Кубогида 8 марта ғолиб бўлган. Шунингдек, “кўршапалаклар” икки марта Чемпионлар Лигаси финалига чиққан.
Маълумот учун, “Валенсия” жорий мавсумда Ла Лигада 25-турдан кейин 18-ўринни эгаллаб турибди ва жамоанинг қуйи лигага тушиб кетиш хавфи мавжуд.
Изоҳ (0)