ДХХ ходимлари томонидан бошқа ҳуқуқни муҳофаза қилувчи идоралар билан ҳамкорликда жойларда ўтказилган тезкор тадбирлар давомида Қорақалпоғистон Республикаси, Хоразм ва Андижон вилоятларида қонунбузилиши ҳолатлари аниқланди.
Жумладан, Андижон вилояти ФВБнинг туман бўлими бошлиғи бино ва иншоотларга ёнғинга қарши жиҳозларни ўрнатиш билан шуғулланувчи МЧЖ томонидан тумандаги ижтимоий соҳа объектларининг бино ва иншоотлари ёғоч қисмларига ёнғин хусусиятини сусайтирувчи махсус суюқлик эритмаси билан ишлов берилганлиги тўғрисидаги далолатномаларни тасдиқлаб беришни ваъда қилган. Бунинг эвазига хизмат хонасида 7 млн 300 минг сўм олган вақтида ашёвий далиллар билан ушланди.
Нукус шаҳар ФВБнинг мансабдор ходими аҳоли ва тадбиркорлик субъектларига ёнғин хавфсизлигини таъминлаш бўйича техник хизмат кўрсатувчи МЧЖ ташкил этмоқчи бўлган фуқарога келгусида унинг фаолиятига раҳнамолик қилишини айтган.
Бунинг эвазига ҳар ойда 200 доллар миқдорида пул беришини талаб қилади. Аммо, у “холис хизмати” учун олдиндан 4 млн сўм олган вақтида ушланди.
Савдо-саноат палатаси Хоразм вилояти бошқармасининг шаҳар бўлими бошлиғи оилавий корхонанинг мавжуд кредит қарздорлигини тижорат банкнинг “Марказлаштирилган кредит тарихи” ахборот маркази базасидан ўчиртириб, ушбу банкдан 100 млн сўм миқдорида имтиёзли кредит олиб беришни ваъда қилган.
Бунинг эвазига 1500 доллар талаб қилиб, олдиндан 10 млн сўм олган вақтида ашёвий далиллар билан ушланди. Ушбу мансабдор шахс муқаддам судланган бўлсада, ўз хатосидан тўғри хулоса чиқармаган.
Бошқа ҳолатда Андижон вилояти Экология бошқармасининг Асака туман бўлими бош инспектори муқаддам судланганлигига қарамасдан, 2021 йилда туман ҳокимининг қарори билан Ёшлар саноат зонаси ҳудудидан ўзининг қариндошига синтепон маҳсулоти ишлаб чиқариш фаолияти билан шуғулланиш мақсадида 30 йил муддатга ижара асосида ажратилган 5 сотих ер майдонини тадбиркорлик билан шуғулланмоқчи бўлган фуқаро номига расмийлаштириб беришни ваъда қилган.
Бунинг эвазига 20 минг доллар олган вақтида ушланди.
Хоразм вилояти Қурилиш ва уй-жой коммунал хўжалиги бош бошқармаси Урганч шаҳар бўлимининг бош мутахассиси 470 м2 ер майдонида кўп қаватли уй қуришга рухсат берувчи ҳужжатларни расмийлаштириб, қурилиш ишларига нисбатан аҳолининг розилиги бўйича далолатномаларни тайёрлаб бериш эвазига 30 млн сўм талаб қилади.
У бош мутахассис сўралган пул маблағидан 20 млн сўмни олган вақтида ушланди. Шунингдек, терговга қадар текширув давомида ушбу ноқонуний ишга вилоят Қурилиш ва уй-жой коммунал хўжалиги бош бошқармасининг Урганч шаҳар бўлими бошлиғи ўринбосари ҳам алоқадор эканлиги аниқланди.
Ҳозирда мазкур шахсларнинг барчасига нисбатан жиноят ишлари қўзғатилиб, тергов ҳаракатлари олиб борилмоқда.
Изоҳ (0)