ДХХ томонидан ўтказилган тезкор тадбирларда пора олишда гумонланиб беш киши ушланди.
Гулистон шаҳар электр тармоқлари корхонаси бошлиғи 2023 йилнинг май ойидан 2024 йилнинг май ойига қадар ушбу корхонада электр энергияси оқимини ҳисобга олиш ва назорат қилиш муҳандиси вазифасида ишлаб келиб, савдо фаолиятини олиб боришга ихтисослашган МЧЖнинг электр энергиясидан 202 миллион 500 минг сўмлик қарздорлигини танишлари орқали ҳисобдан чиқартириб бериш эвазига 90 миллион сўм талаб қилган.
У 2023 йилнинг июнь—декабрь ойлари давомида тадбиркордан жами 78 миллион сўм олади, аммо ваъдасининг устидан чиқа олмасдан, яъни қарздорликни базадан ўчиртира олмасдан, барча олган пулларидан дастлабки 3 миллион сўмни учинчи шахс орқали қайтариб берган вақтида ДХХ ва Бош прокуратура ҳузуридаги департамент ходимлари томонидан ашёвий далиллар билан ушланди.
Тошкент вилоятининг Қибрай туманида фаолият юритувчи хусусий корхона раҳбари ўзининг мансабдор танишлари орқали, Наманган вилоятининг Давлатобод туманида барпо этилаётган Янги Наманган шаҳарчасини ичимлик суви билан таъминлаш учун Косонсой шаҳридаги сув тозалаш иншоотини реконструкция қилиш лойиҳасини тендер савдоларида ютиб бериш эвазига тадбиркордан 4 миллиард сўм талаб қилади.
Давлат хавфсизлик хизмати ходимлари томонидан ўтказилган тезкор тадбирда, у олдиндан 30 минг доллар олган вақтида ушланди.
Терговга қадар текширув давомида, Хоразм вилояти Қўшкўпир туманидаги чорвачиликка ихтисослашган фермер хўжалик раҳбари ушбу ноқонуний ишга алоқадор эканлиги аниқланиб, у ҳам процессуал тартибда ушланди.
Навоий вилояти ИИБ тезкор қидирув хизматининг киберхавфсизлик бўлинмаси катта тезкор ходими Кармана туманида яшовчи фуқаронинг пластик картасидан 62 миллион сўм пул маблағини ноқонуний ечиб олган шахсларни аниқлаб бериш эвазига 600 доллар талаб қилган.
Бундай ҳолатларни фош этиш катта тезкор ходимнинг бевосита хизмат вазифасига кирса-да, у жабрланувчидан сўралган пул маблағини олган вақтида ДХХ ва Иқтисодий жиноятларга қарши курашиш департаменти ходимлари томонидан ашёвий далиллар билан ушланди.
Сирдарё вилоятида кузатилган ҳолатда, Янгиер шаҳар ИИБ жамоат хавфсизлиги хизмати пробация гуруҳи катта инспектори пробация назоратида турган, 2024 йилнинг февраль ойида суд ҳукмига асосан Жиноят кодексининг 168-моддаси 3-қисми “б” банди билан айбли деб топилиб, ахлоқ тузатиш ишлари жазоси тайинланган шахсни жазони Янгиер шаҳрида ўтамаслик, Тошкент шаҳрида эркин тадбиркорлик фаолиятини олиб бориши учун ёрдам бериш, яшаш манзилини текширмаслик ҳамда чора кўрмаслик эвазига Янгиер шаҳридан 2 хонали уйни сотиб олиб, унинг номига расмийлаштириб беришини ҳамда 500 доллар беришини талаб қилган.
ДХХ ходимлари томонидан прокуратура ва ички ишлар органлари билан ҳамкорликда ўтказилган тезкор тадбирда катта инспектор 400 доллар ҳамда 1 миллион 260 минг сўмни ўз хизмат хонасида олган вақтида ушланди.
Ҳозирда мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланган.
Изоҳ (0)