DXX xodimlari tomonidan boshqa huquqni muhofaza qiluvchi idoralar bilan hamkorlikda joylarda o‘tkazilgan tezkor tadbirlar davomida Qoraqalpog‘iston Respublikasi, Xorazm va Andijon viloyatlarida qonunbuzilishi holatlari aniqlandi.
Jumladan, Andijon viloyati FVBning tuman bo‘limi boshlig‘i bino va inshootlarga yong‘inga qarshi jihozlarni o‘rnatish bilan shug‘ullanuvchi MCHJ tomonidan tumandagi ijtimoiy soha obyektlarining bino va inshootlari yog‘och qismlariga yong‘in xususiyatini susaytiruvchi maxsus suyuqlik eritmasi bilan ishlov berilganligi to‘g‘risidagi dalolatnomalarni tasdiqlab berishni vaʼda qilgan. Buning evaziga xizmat xonasida 7 mln 300 ming so‘m olgan vaqtida ashyoviy dalillar bilan ushlandi.
Nukus shahar FVBning mansabdor xodimi aholi va tadbirkorlik subyektlariga yong‘in xavfsizligini taʼminlash bo‘yicha texnik xizmat ko‘rsatuvchi MCHJ tashkil etmoqchi bo‘lgan fuqaroga kelgusida uning faoliyatiga rahnamolik qilishini aytgan.
Buning evaziga har oyda 200 dollar miqdorida pul berishini talab qiladi. Ammo, u “xolis xizmati” uchun oldindan 4 mln so‘m olgan vaqtida ushlandi.
Savdo-sanoat palatasi Xorazm viloyati boshqarmasining shahar bo‘limi boshlig‘i oilaviy korxonaning mavjud kredit qarzdorligini tijorat bankning “Markazlashtirilgan kredit tarixi” axborot markazi bazasidan o‘chirtirib, ushbu bankdan 100 mln so‘m miqdorida imtiyozli kredit olib berishni vaʼda qilgan.
Buning evaziga 1500 dollar talab qilib, oldindan 10 mln so‘m olgan vaqtida ashyoviy dalillar bilan ushlandi. Ushbu mansabdor shaxs muqaddam sudlangan bo‘lsada, o‘z xatosidan to‘g‘ri xulosa chiqarmagan.
Boshqa holatda Andijon viloyati Ekologiya boshqarmasining Asaka tuman bo‘limi bosh inspektori muqaddam sudlanganligiga qaramasdan, 2021-yilda tuman hokimining qarori bilan Yoshlar sanoat zonasi hududidan o‘zining qarindoshiga sintepon mahsuloti ishlab chiqarish faoliyati bilan shug‘ullanish maqsadida 30 yil muddatga ijara asosida ajratilgan 5 sotix yer maydonini tadbirkorlik bilan shug‘ullanmoqchi bo‘lgan fuqaro nomiga rasmiylashtirib berishni vaʼda qilgan.
Buning evaziga 20 ming dollar olgan vaqtida ushlandi.
Xorazm viloyati Qurilish va uy-joy kommunal xo‘jaligi bosh boshqarmasi Urganch shahar bo‘limining bosh mutaxassisi 470 m2 yer maydonida ko‘p qavatli uy qurishga ruxsat beruvchi hujjatlarni rasmiylashtirib, qurilish ishlariga nisbatan aholining roziligi bo‘yicha dalolatnomalarni tayyorlab berish evaziga 30 mln so‘m talab qiladi.
U bosh mutaxassis so‘ralgan pul mablag‘idan 20 mln so‘mni olgan vaqtida ushlandi. Shuningdek, tergovga qadar tekshiruv davomida ushbu noqonuniy ishga viloyat Qurilish va uy-joy kommunal xo‘jaligi bosh boshqarmasining Urganch shahar bo‘limi boshlig‘i o‘rinbosari ham aloqador ekanligi aniqlandi.
Hozirda mazkur shaxslarning barchasiga nisbatan jinoyat ishlari qo‘zg‘atilib, tergov harakatlari olib borilmoqda.
Izoh (0)