Самарқанд вилоятининг Самарқанд шаҳрида кадастр ходими 1 000 доллар пора билан қўлга олинди. Бу ҳақда “Дарё”га вилоят ИИБ ахборот хизмати раҳбари Жаҳонгир Сагдуллаев хабар берди.
Қайд этилишича, кадастр ходими автотураргоҳ (гараж)ни уйга қўшиб, омборхона сифатида кадастр ҳужжатларини расмийлаштириб беришни ваъда қилган. Ҳамда эвазига 1 000 АҚШ доллари миқдорида пул талаб қилган.
2023 йил 7 июнь куни фуқаро ҳуқуқни муҳофаза қилувчи органларга ариза билан мурожаат қилиб, унда Кадастрлар палатаси Самарқанд шаҳар филиали ишлаб чиқариш муҳандиси лавозимида ишловчи шахс Самарқанд шаҳар А.Жомий кўчасида жойлашган автотураргоҳ (гараж)ни уйга қўшиб, омборхона сифатида кадастр ҳужжатларини расмийлаштириб беришини, эвазига кўп пул талаб қилганини баён қилган.
“Мазкур аризага асосан, жорий йилнинг 8 июнь куни Самарқанд вилояти ИИБ Тезкор-қидирув хизмати ЖҚБ Коррупция ва иқтисодий жиноятларга қарши курашиш бўлими Ер ресурслари талон-торож қилинишига қарши курашиш бўлинмаси ҳамда ДХХ Самарқанд вилояти бошқармаси ходимлари ҳамкорлигида ўтказилган тезкор тадбир давомида, Кадастрлар палатаси Самарқанд шаҳар филиали биноси ёнида Б.Н. ариза муаллифидан 1 000 долларни олган вақтида ашёвий далиллар билан қўлга олинди”, — дейилади вилоят ИИБ тарқатган хабарда.
Қўшимча қилинишича, мазкур ҳолат юзасидан терговга қадар текшириш ҳаракатлари олиб борилмоқда.
Изоҳ (0)