Самарқанд шаҳрида банкдан кредит олишда ёрдам бериш эвазига пул талаб қилган ҳоким ёрдамчиси қўлга олинди. Бу ҳақда Самарқанд вилояти ИИБ ахборот хизмати хабар берди.

Қайд этилишича, фуқаро Самарқанд шаҳар “Шукрона” маҳалласида маиший хизмат кўрсатиш йўналишида тадбиркорликни йўлга қўйиш мақсадида “Халқ банки” шаҳар филиалидан кредит олмоқчи бўлиб юрган вақтида, мазкур МФЙда ҳоким ёрдамчиси лавозимида ишловчи шахс унга “ўз хизматини” таклиф қилган.

Фуқаро 7 июнь куни ҳуқуқни муҳофаза қилувчи органларга ариза билан мурожаат қилиб, ҳоким ёрдамчиси банкдаги мансабдор танишлари орқали 150 миллион сўм миқдорида кредит чиқариб бериш эвазига 1,5 минг АҚШ доллари миқдоридаги пулларни талаб қилиб келаётганини билдириб, унга нисбатан қонуний чора кўришни сўраган.

Мазкур аризага асосан Самарқанд вилояти ИИБ Тезкор-қидирув хизмати ЖҚБ Коррупция ва иқтисодий жиноятларга қарши курашиш бўлими, ДХХ Самарқанд вилояти бошқармаси ва департаментнинг Самарқанд вилоят бошқармаси ходимлари ҳамкорлигида тезкор тадбир ўтказилган. Тадбир давомида Самарқанд шаҳар Сайфи Сарой кўчасида жойлашган “Шукрона” МФЙ биноси ёнида ҳоким ёрдамчиси ариза муаллифидан 1,5 минг доллар миқдоридаги пулларни олган вақтида ашёвий далиллар билан қўлга олинган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.

Пора билан қўлга тушган ҳоким ёрдамчилари

Май охирларида Навоий вилоятининг Хатирчи туманида ҳоким ёрдамчиси пора олаётганида ушланганди. Фуқаро 25 миллион сўм кредит олиш ва тадбиркорликни бошлаш мақсадида маҳалланинг ҳоким ёрдамчисига учрашган. Аммо ҳоким ёрдамчиси унга тавсиянома текинга берилмаслигини айтган. Бироқ у фуқарога “ёрдам бериш” учун 100 доллар ва 900 минг сўм олаётганида қўлга тушган.

Апрель ойида эса Қашқадарёнинг Яккабоғ ва Шаҳрисабз туманларида икки нафар ҳоким ёрдамчисига жиноят иши қўзғатилганди. Улардан бири 1,7 миллиард сўмлик имтиёзли кредит маблағларини талон-торож қилган бўлса, бошқаси ер билан боғлиқ ноқонуний ишга аралашган.