Самарқандда иш стажини сохталаштириш эвазига фуқародан 300 доллар сўраган Пенсия жамғармаси ходими ушланди

Пенсия жамғармаси Самарқанд вилояти Самарқанд шаҳар бўлими ходими фуқародан пора олаётган вақтда ушланди, дея хабар қилмоқда вилоят ИИБ.

2022 йил 18 июль куни фуқаро ариза билан мурожаат қилган. Аризада ёзилишича, нафақага чиқиши учун Пенсия жамғармаси Самарқанд шаҳар бўлимига бориб, ишлаган вақтини ҳисоблатган вақтида, 1 йил 6 ой иш стажи етмаган.

У шу ерда ўзини Пенсия жамғармаси Самарқанд шаҳар бўлими бошлиғи ўринбосари деб таништирган К.Ш. билан танишиб қолган. Ушбу шахс уларнинг ишончига кириб, етмаган иш стажини сохталаштириш орқали тўғрилаш ва нафақа расмийлаштириб бериш эвазига 300 АҚШ доллари миқдоридаги пулларни талаб қилган.

Шу ҳолат сабаб фуқаро унга нисбатан қонуний чора кўришни сўраган.

Мазкур аризага асосан, шу куни Самарқанд вилояти ИИБ ЖҚБ Коррупция ва иқтисодий жиноятларга қарши курашиш бўлими, ДХХ Самарқанд вилояти бошқармаси ва шаҳар прокуратураси ходимлари ҳамкорлигида, Молия вазирлиги ҳузуридаги бюджетдан ташқари Пенсия жамғармаси Самарқанд вилояти Самарқанд шаҳар бўлими биносида ўтказилган тезкор тадбир давомида, К.Ш. ўз хизмат хонасида ариза муаллифидан 300 АҚШ доллари миқдоридаги пулларни олган вақтида ашёвий далиллар билан қўлга олинган.

Мазкур ҳолат юзасидан терговга қадар текшириш ҳаракатлари олиб борилмоқда.