Америка Қўшма Штатларига ишга юборишни ваъда қилган фирибгарлар ушланди, деб хабар бермоқда Прокуратура департаменти ахборот хизмати.
Маълум қилинишича, ҳолат Бош прокуратура ҳузуридаги департаментнинг Тўрақўрғон тумани бўлими ва ДХХ ходимлари ҳамкорлигида ўтказилган тезкор тадбирда аниқланган. Фуқаро Жасур (исмлар ўгартирилган) Дилбекнинг ишончига кириб, уни айланма йўллар орқали АҚШ ишга юбориши эвазига 5 000 АҚШ долларини олган вақтида ашёвий далиллар билан ушланган.
Департаментнинг Самарқанд шаҳар бўлими томонидан ўтказилган терговга қадар текширувда эса фуқаролар Миролим ва Рустам икки нафар қўшниси Мухтор ва Сардорнинг ишончига кириб, уларни АҚШга ишга юбориши эвазига жами 18 000 АҚШ долларини фирибгарлик йўли билан қўлга киритгани аниқланди.
Мазкур ҳолатлар юзасидан Жиноят кодексининг 168-моддаси (фирибгарлик) билан жиноят ишлари қўзғатилиб, тергов ҳаракатлари ўтказилмоқда.
АҚШга ноқонуний бориш
АҚШ—Мексика чегараси орқали Америкага киришга уринаётган Ўзбекистон фуқароларига 2023 йилнинг ноябрида огоҳлантириш эълон қилиниб, унда ноқонуний кираётган фуқаролар АҚШга қўйиб юборилмаслиги, иммиграция иши ҳал қилингунга қадар ҳибсда сақланиши маълум қилинганди.
Ўша йилнинг декабрида АҚШга ноқонуний йўллар билан кетган 119 нафар ўзбекистонлик ватанга қайтарилган эди. 2024 йил март ойида эса яна 74 нафар ўзбекистонлик олиб келинди.
АҚШнинг Ўзбекистондаги элчихонаси ноқонуний миграция хавфли ва серхаражат уриниш эканини билдириб, Ўзбекистон фуқароларини одамларни товар сифатида кўрадиган жиноий гуруҳлар ёлғон ваъдаларига ишониб, жабрдийда бўлишдан огоҳлантирди.
2021 йилдан 2023 йилгача Ўзбекистоннинг 13 600 нафар фуқароси Мексика орқали АҚШга ноқонуний киришга уринган.
Изоҳ (0)