Тошкент шаҳридаги «Фарҳод» деҳқон бозори директори ва унинг ўринбосари бозордаги тадбиркорлардан ноқонуний равишда пул ундириб келгани аниқланди, деб хабар беради ИИВ Коррупция ва иқтисодий жиноятларга қарши курашиш бошқармаси.
5 апрель куни Тошкент шаҳар ИИББга «Фарҳод» деҳқон бозори ҳудудида тадбиркорлик фаолияти билан шуғулланувчи фуқаро ариза билан мурожаат қилиб, унда бозор директори ва унинг хавфсизлик бўйича ўринбосари Тошкент шаҳар ҳокимининг 2021 йил 19 февралдаги 203-сонли «Элга хизмат» ва «Арзонлаштирилган савдо ярмаркалари» савдо нуқталаридан тўлов олинмаслиги ҳақидаги қарорига зид равишда пул ундириб келаётганини маълум қилган. Бозор раҳбарияти пулни тўламаганларни бозордан чиқариб юбориш билан қўрқитиб, 2021 йил сентябрь ойидан буён ҳар 10 кунлик савдо фаолияти учун 660 минг сўмдан пул маблағларини кассир орқали олиб келган. Тадбиркор охирги 2 ой учун 3,4 миллион сўм тўлашни ноқонуний равишда талаб қилаётганликларини билдириб, уларга нисбатан қонуний чора кўришни сўраган.
Мазкур аризага асосан, шу куни Тошкент шаҳар ИИББ ЖҚБ Коррупция ва иқтисодий жиноятларга қарши курашиш бўлими ҳамда ДХХ Тошкент шаҳар бошқармаси ходимлари ҳамкорлигида тезкор тадбир ўтказилган. Тадбирда «Халқ банки» Учтепа филиалининг «Фарҳод» деҳқон бозорига хизмат кўрсатувчи кассири, хизмат хонасида ариза муаллифидан 3,4 миллион сўм олаётган вақтида ашёвий далиллар билан ушланган. Шунингдек, унинг ёнидан кунлик тушумдан инкассация қилинган 8,3 миллион сўм ва инкассация қилинмаган 9,15 миллион сўм пул маблағлари борлиги аниқланиб, олинган.
Тезкор тадбир давомида «Фарҳод» деҳқон бозори директори ҳамда унинг хавфсизлик бўйича ўринбосари ушланиб, унинг Gentra автомашинасида қарийб 25 миллион сўм пул маблағи борлиги аниқланган.
Ҳолат юзасидан 2022 йил 6 апрель куни Тошкент шаҳар ИИББ ҳузуридаги Тергов бошқармаси томонидан Жиноят кодексининг тегишли моддалари билан жиноят иши қўзғатилиб, Жиноят-процессуал кодексининг 224-моддаси тартибида ушланган. Жиноят иши юзасидан тергов ҳаракатлари олиб борилмоқда.
Аввалроқ Самарқандда киракашлардан ҳар куни 30 минг сўм «ўлпон» олиб юрган шахслар ушлангани, Тошкентда «Чорсу»даги савдо жойи учун 300 доллар пора сўраган бозор директори ўринбосари қўлга олингани тўғрисида хабар берилганди.
Мавзуга доир:
Изоҳ (0)