Андижонда Ўзбекистон фуқароларини Польшага ишлашга ноқонуний юбориш билан шуғулланиб келган фирма фаолиятига чек қўйилди, деб хабар беради Андижон вилояти ИИБ ахборот хизмати.
Андижон вилояти ички ишлар бошқармасига Марҳамат туманида яшовчи фуқаро ариза билан мурожаат қилиб, Андижон шаҳрида Польшага фуқароларни ишлаш учун жўнатаётган фирма борлигини эшитганини айтган.
2022 йил 17 январь куни ушбу фирмага борган вақтида Польшага ҳайдовчилик ишига жўнатиш учун унга 3,5 минг доллар беришини, ҳозирда ҳужжатларни расмийлаштириш ва бошқа тўловлар учун олдиндан 1,5 минг доллар кераклигини айтишган. Фуқаро танишларидан сўраб-суриштирган вақтида масъулияти чекланган жамиятнинг фуқароларни чел элга юбориш учун махсус лицензияси йўқлигидан хабар топиб, 1,5 минг долларни талаб қилган шахсга нисбатан қонуний чора кўришни сўраган.
Мазкур мурожаатга асосан, Андижон вилояти ИИБ коррупция ва иқтисодий жиноятларга қарши курашиш бўлими, ДХХ ҳамда Бош прокуратура ҳузуридаги департаментнинг Андижон вилояти бошқармалари ходимлари билан ҳамкорликда тезкор тадбир ўтказилган.
Тезкор тадбир натижасида ариза муаллифидан фуқаро уни Польшага юк ташиш автомашинаси ҳайдовчилиги вазифасига ишлаш учун танишлари орқали ишга юбориш эвазига фирибгарлик йўли билан талаб қилинган 3,5 минг доллардан 1,5 минг долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) 3-қисми «б» банди ва 28, 211-моддаси (пора олиш) 2-қисми «а» банди билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
Эслатиб ўтамиз, 2020 йилда ҳам Андижонда Польшага ишга жўнатишни ваъда қилиб, фуқаролар пулларини ўзлаштирган корхона мансабдорларига жиноий иш қўзғатилганди.
Изоҳ (0)