17 май куни Тошкент вилоятининг Бўстонлиқ туманида деҳқон хўжалигини юритиш учун мўлжалланган ер майдонини сотишга уринган шахслар қўлга олинди. Бу ҳақда ИИВ ЖҚББ Коррупция ва иқтисодий жиноятларга қарши курашиш бошқармаси, Ер ресурслари талон-торож қилинишига қарши курашиш бўлими маълум қилди.
Маълум қилинишича, фуқаро ИИВга ариза билан мурожаат қилиб, ўз аризасида тадбиркорлик қилиш мақсадида интернет тармоқларидан ер майдонларини кўриб юрганида ўзига нотаниш бўлган «маклер» муқаддам Бўстонлиқ тумани кадастр агентлигида ишлаган шахс билан таништирганини айтиб, 1,32 гектар сотиладиган ер борлигини билдирган. Ушбу шахс Бўстонлиқ тумани «Чимбойлик» МФЙ ҳудудида боғдорчиликка ихтисослашган деҳқон хўжалигини юритиш учун мўлжалланган 1,32 гектар ер майдони борлигини, ер майдонлари 3 нафар фуқаро номларига расмийлаштириб қўйилгани ва уларни 50 минг долларга сотишларини маълум қилган.
Шунингдек, фуқаро улар кейинчалик ер майдонига қурилиш учун ҳужжатларни кадастр ходимлари орқали 12 минг доллар эвазига расмийлаштиришга ёрдам беришларини айтганликларини маълум қилиб, уларга нисбатан қонуний чора кўришни сўраган.
Мазкур аризага асосан шу куни ИИВ ЖҚББ Коррупция ва иқтисодий жиноятларга қарши курашиш бошқармаси Ер ресурслари талон-торож қилинишига қарши курашиш бўлими, вазирлик ҳузуридаги Тергов департаменти, ДХХ ҳамда Бош прокуратура ходимлари ҳамкорлигида тезкор тадбир ўтказилган. Ўтказилган тезкор тадбир давомида Чилонзор туманида жойлашган Humo Арена муз саройи автотураргоҳида ўтказилган тадбир давомида 3 нафар гумонланувчи фуқаро ариза муаллифидан талаб қилинган 62 минг доллардан 59 минг долларни олган вақтларида ашёвий далиллар билан ушланган.
Ҳолат юзасидан терговга қадар текширув ҳаракатлари олиб борилмоқда.
Аввалроқ Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Давлат кадастрлари палатаси Нуробод туман филиали мутахассислари 2 млн сўм пора билан ушлангани тўғрисида хабар берилганди.
Мавзуга доир:
- Сурхондарёда қишлоқ хўжалиги ерларида қурилиш ишларини амалга ошириб, 3,1 млрд сўмдан ортиқ зарар етказган жамият раҳбари аниқланди
- Наманганда фуқарога фермер хўжалиги ерини ажратиб бериш учун 15 минг доллар сўраган ҳоким ёрдамчиси ва унинг шериклари ушланди
- Самарқандда 1 гектар ерни 430 минг долларга сотишга уринган шахслар қўлга олинди
Изоҳ (0)