Сурхондарёда 2 минг долларга чегара қўшинлари ҳарбий қисмига ишга киритиб қўймоқчи бўлган шахс ушланди

Сурхондарё вилояти Термиз туманида пул эвазига Чегара қўшинларига ишга киритмоқчи бўлган шахс қўлга олинди. Бу ҳақда вилоят Ички ишлар бошқармаси хабар қилди.

Термиз туманида яшовчи фуқаро Б.Б. 11 апрель куни вилоят ИИБ бошлиғи номига ариза билан мурожаат қилган. У ўз аризасида апрель ойи бошларида ўзига олдиндан таниш бўлган С.Д. исмли фуқаро унга Термиз шаҳрида жойлашган Чегара қўшинларида юқори лавозимда ишловчи танишлари борлигини ва улар орқали ишга жойлаштириб қўйишини айтганини маълум қилган. Таниши ишга жойлаштириш харажатлари 2 минг доллар бўлишини, ушбу пулларни берса, 44 кун ўтгандан сўнг вилоятларнинг бирида жойлашган Чегара қўшинлари ҳарбий қисмларига ишга буйруғи чиқишини айтган. Фуқаро уларга нисбатан қонуний чора кўришини сўраб мурожаат қилган.

Аризага асосан, 11 апрель куни соат 18:00 ларда Сурхондарё вилояти ИИБ Жиноят қидирув бошқармаси Коррупция ва иқтисодий жиноятларга қарши курашиш бўлими, ДХХ Сурхондарё вилояти бошқармаси ҳамда департаментнинг вилоят бошқармаси ходимлари томонидан ҳамкорликда тезкор тадбир ўтказилган. Тадбир давомида фуқаро С.Д. Термиз шаҳар «Тупроққўрғон» маҳалласи ҳудудида ариза муаллифи Б.Б.дан талаб қилган 2 минг доллар миқдоридаги пулдан 900 доллар ҳамда 1 миллион 100 сўм кимёвий ишлов берилган пулларни санаб олган вақтида тадбир иштирокчилари томонидан ушланиб, процессуал тартибда расмийлаштирилган.

Ҳолат юзасидан С.Д.га нисбатан Жиноят кодексининг 168-моддаси (фирибгарлик) 1-қисми, 28.211-моддаси (пора бериш) 1-қисми билан жиноят иши қўзғатилган. Ҳозирда тергов ҳаракатлари олиб борилмоқда.

Аввалроқ Наманганда аёл 18 нафар фуқарони шифохонага ишга жойлаш учун 300 ва 500 доллардан олгани аниқланганди. Шунингдек, Сирдарёда тез ёрдамга диспетчерликка ишга киритиб қўйиш учун 700 доллар сўраган шифокор қўлга олингани, Қорақалпоғистонда фуқарони темир йўлга ишга киритиш учун минг доллар олган техникум директори ушлангани ҳақида хабар берилган.