Жанубий Корея президенти Юн Сок Ёл 4 декабрга ўтар кечаси мамлакатда жорий этилган ҳарбий ҳолатни бекор қилишга рози бўлди. Бу ҳақда Чосун хабар берди.
Сиёсатчининг сўзларига кўра, у ҳарбий ҳолатни амалга оширишга жалб этилган ҳарбийларни чақириб олган.
Биз Миллий мажлис талабини қабул қилиб, ҳарбий ҳолатни бекор қиламиз. Вазирлар Маҳкамасининг йиғилишини дарҳол чақирдик, бироқ ҳозир эрта тонг бўлгани сабабли кворум ҳали тўпланмаган. Шунинг учун кворум тўпланиши билан ҳарбий ҳолатни бекор қиламиз, деди Юн Сок Ёл.
Шунингдек, у Миллий мажлисдан “мамлакат фаолиятини издан чиқараётган қайта-қайта импичмент жараёнлари, қонунчилик ва бюджет фаолиятини дарҳол тўхтатиш”ни сўради.
Кейинроқ ҳукумат мажлиси бўлиб ўтди, унда ҳарбий ҳолатни бекор қилиш тўғрисидаги қарор расман қабул қилинди.
Жанубий Кореяда ҳарбий ҳолат
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. У 45 йил ичида мамлакатда ҳарбий ҳолат эълон қилган биринчи давлат раҳбари бўлди.
Кўп ўтмай Сеулдаги Миллий Ассамблея биноси олдида намойишчилар йиғила бошлади, полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади.
Президент истеъфоси талаб қилинмоқда
Мухолифатдаги “Тобуро” демократик партияси бекор қилинган ҳарбий ҳолатдан кейин Жанубий Корея президенти Юн Сок Ёлнинг истеъфосини талаб қилди. “Тобуро” президентнинг истеъфоси учун партиянинг барча аъзолари овоз берганини таъкидлади. Акс ҳолда мухолифат партияси аъзолари Юн Сок Ёлга нисбатан импичмент процедурасини бошлашлари билан таҳдид қилди. Улар президент ҳараакатлари “конституция ва демократияни бузгани”ни таъкидлади.
Изоҳ (0)