Ўзбекистоннинг Корея Республикасидаги элчихонаси ушбу мамлакатда бўлиб турган Ўзбекистон фуқароларига мурожаат қилди.
“Бугунги кунда мамлакатда юзага келаётган ички сиёсий вазиятдан келиб чиққан ҳолда, барчангиздан Жанубий Кореяда турли хил митинглар ва намойишларда иштирок этмасликка, одамлар гавжум жойларга бормасликка, ўзингизнинг шахсий хавфсизлигингиз ва соғлигингизни эҳтиёт қилишга чақириб қоламиз”, дейилади хабарда.
Зарурат бўлган ҳолатда қуйидаги телефон рақамга мурожаат қилиш сўралган:
- +82 10 3213 4505
- +82 10 2909 4334
Аввалроқ Жанубий Корея президенти Юн Сек Ёл телевидение орқали халққа мурожаатида мамлакатда ҳарбий ҳолат жорий этилганини маълум қилганди.
“Шимолий Корея тарафдори кучларни йўқ қилиш ва эркин конституциявий тузумни ҳимоя қилиш учун ҳарбий ҳолат эълон қиламан”, деган президент.
Маҳаллий ОАВга кўра, Юн Сек Ёл, шунингдек, Миллий ассамблея (Жанубий Кореянинг бир палатали парламенти) июнь ойида янги ҳукумат инаугурациясидан сўнг 22 нафар ҳукумат амалдорига импичмент эълон қилишга уринганини айтган.
Бу, давлат раҳбарининг сўзларига кўра, “нафақат мисли кўрилмаган”, балки давлатнинг суд ва ижро ҳокимиятини фалаж қилади. У, шунингдек, Демократик партияни (парламентда кўпчиликни ташкил этади) келгуси йил бюджетини рекорд даражадаги 4,1 триллион вонга (тахминан 3 миллиард доллар) қисқартириш ниятини танқид қилган.
“Миллий Ассамблеямиз жиноий гуруҳлар уясига айланди. Либерал демократиянинг асоси бўлиши керак бўлган Миллий Ассамблея либерал демократик тизимни йўқ қиладиган йиртқич ҳайвонга айланди”, деган у.
Изоҳ (0)