Жанубий Корея ҳукумати икки томонлама муносабатларни яхшилашга интилиш мақсадида Корея халқ демократик республикаси чегарасида жойлашган радиокарнайлар орқали Пхеньянни танқид қилувчи дастурларни эфирга узатишни тўхтатди. Бу ҳақда Yonhap агентлиги хабар берди.
“Бу қарор Корея яриморолида Кореялараро ишонч ва тинчликни тиклаш ваъдасини амалга ошириш бўйича саъй-ҳаракатлар доирасида қабул қилинди”, дея Қўшма штаблар қўмитаси вакилининг сўзларини келтиради агентлик.
Эшиттиришлар ўтган йилнинг июнь ойида Пхеньян Жанубий Кореяга ахлат тўлдирилган ҳаво шарларини жўнатганига жавобан қайта бошланган эди
2024 йил май ойининг охиридан бошлаб Шимолий Корея Жанубга минглаб ахлат тўлдирилган шарларни юборди. Бу Жанубий Кореядаги шимолий кореялик қочқинлар ҳаво шарлари ёрдамида КХДРга юбораётган тарғибот варақаларига жавобан қилинган эди
3 июнь куни Жанубий Кореяда муддатидан олдин президент сайлови ўтказилди. Унда Бирлашган демократик партиядан номзод Ли Же Мёнг ғалаба қозонди.
Июнь ойи бошида Жанубий Кореянинг янги президенти Ли Же Мёнг алоқа каналларини очиш ва Шимол билан Корея яриморолида мустаҳкам тинчлик ўрнатиш учун мулоқот ҳамда ҳамкорликни давом эттириш ниятида эканини маълум қилди. Шу билан бирга, у ўз ҳукумати Шимолий Кореянинг эҳтимолий таҳдидига қарши Жанубий Корея, АҚШ ва Япониянинг мустаҳкам ҳарбий иттифоқига асосланган “кучли тийиб туриш” ёрдамида курашишини таъкидлади.
Изоҳ (0)