АҚШ президенти Дональд Трамп қисқа вақт ичида ядро қуроли пайдо бўлишига йўл қўймаслик учун Эроннинг Фордодаги ядровий объектига зарба бериши мумкин. Бу ҳақда CBS телеканали ўз манбаларига таяниб, хабар бермоқда.
“Фордони ишдан чиқариш зарур, чунки у ерда нисбатан қисқа вақт ичида қурол ишлаб чиқарилиши мумкин”, дейди Трампнинг позициясидан хабардор манбалар.
Манбаларга кўра, Трампга Эроннинг энг яхши қўриқланадиган ядровий объектига зарба беришнинг хавфи ва эҳтимолий фойдаси ҳақида маълумот берилган. Таъкидланишича, унинг ҳозирги фикри шуки, объектни ишдан чиқариш керак, чунки у ерда қисқа вақт ичида қурол ишлаб чиқарилиши мумкин.
Телеканалнинг қайд этишича, Трамп амалга оширилаётган дипломатик саъй-ҳаракатлардан, хусусан, жума куни Эрон ташқи ишлар вазири Аббос Аракчининг Европа Иттифоқи вакиллари билан Швейцарияда бўлиб ўтадиган учрашувидан хабардор.
Маълумотларга кўра, Марказий разведка бошқармаси директори Жон Ретклифф ёпиқ форматда Эрон раҳбариятининг расмий буйруғи йўқлигига қарамай, мамлакат ядро қуролига эга бўлиш арафасида турганини маълум қилган.
Эрон ташқи ишлар вазири 20 июнь куни Женевада Европа давлатлари билан музокаралар ўтказилишини тасдиқлади. Унинг сўзларига кўра, музокараларда Германия ташқи ишлар вазири Йоханн Вадефул, Франция ташқи ишлар вазири Жан-Ноэл Барро ва Буюк Британия ташқи ишлар вазири Девид Лемми иштирок этади.
Эрон ўзининг атом лойиҳасида ҳарбий мақсад йўқлигини таъкидламоқда. МАГАТЭ бош директори Рафаэл Гроссининг айтишича, агентлик инспекторлари ИРИ ядро қуроли яратиш дастурини олиб бораётганига аниқ далилларни кўрмаган. CNN телеканали хабар беришича, АҚШ разведка ҳамжамияти АҚШ президенти Дональд Трамп ва Исроил расмийларининг баёнотларига зид ўлароқ, ислом республикаси ядро қуроли яратишга интилмаган, деб ҳисоблаган.
Буюк Британиянинг Ўзбекистондаги собиқ элчиси Крейг Мюррей РИА Новости агентлигига берган интервьюсида, Теҳрон сўнгги бир неча йил ичида Исроилнинг хатти-ҳаракатларига қарамай, ғоят сабр-тоқат ва тинчликсеварлик намойиш этганини таъкидлаган.
Исроил 13 июнга ўтар кечаси Эроннинг ядро дастурига қарши “Исёнкор шер" операциясини бошлади. Бир суткадан кам вақт ўтгач, Ислом Республикаси жавоб ҳужумини амалга оширди. Кейинги кунларда Исроил ва Эрон ўзаро зарба беришни давом эттирди. Иккала томон ҳам ушбу ҳужумлар натижасида ҳалок бўлганлар ва жабрланганлар борлигини маълум қилди, ўз ҳудудларидаги бир қатор объектларга зарба етказилганини тан олди, аммо етказилган зарар чекланган эканини таъкидлади.
Изоҳ (0)