“Ҳизбуллоҳ” Ливан ҳукуматининг қурол-яроғ устидан давлат монополиясини ўрнатиш қарорини рад этиб, қуролсизланиш талабини тан олмади. Бу ҳақда BBC хабар берди.
Ҳаракат Ливан ҳукуматининг бу қарорига 6 август куни муносабат билдириб, шундай деган:
“Биз бу қарорни гўёки бўлмагандек қабул қиламиз. Бу катта гуноҳга тенг”.
Мазкур баёнот ҳаракатга нисбатан халқаро босим ортиб бораётганига қарамай янгради. АҚШ ва Ливандаги мухолиф кучлар “Ҳизбуллоҳ”дан қуролсизланишни талаб қилмоқда. Эрон томонидан қўллаб-қувватланадиган ҳаракат 2024 йили Исроил билан бўлган урушда сезиларли зарар кўрган бўлса-да, ўз арсеналидан воз кечмаган.
“Ҳизбуллоҳ” Ливан ҳукуматининг қурол таъминоти ва ишлаб чиқаришни фақат давлат қўшинларига бириктириш қарорини “Америка ҳукмининг натижаси” сифатида баҳоламоқда. Ҳаракат миллий хавфсизлик стратегияси бўйича мулоқотга тайёр эканини билдирган, бироқ бу “тажовуз остида” бўлмаслигини таъкидламоқда.
Ливан ҳукумати 5 август куни армияга йил охиригача барча қуролларни давлат назоратига олиш режасини ишлаб чиқишни топширганди. Бош вазир Навоф Саламга кўра, лойиҳа шу ой охирида ҳукуматга тақдим этилади.
АҚШ июнь ойида Ливанга “Ҳизбуллоҳ” қуролсизланса, Исроил ҳужумларни тўхтатиб, мамлакат жанубидаги 5 та ҳудуддан қўшинларини олиб чиқишини таклиф қилган. Ҳаракат раҳбари Наим Қосим эса ўзининг сўнгги видеомурожаатида Исроил ҳужумлари давом этар экан, “қурол масаласи” муҳокама қилинмаслигини айтган.
Изоҳ (0)