АҚШ президенти Дональд Трампнинг “туғилган асосида фуқаролик“ беришни чекловчи фармони вақтинча тўхтатилди. Бу ҳақда Associated Press хабар берди.
Нью-Хемпшир штатидаги федерал судья Жозеф Лаплант ушбу фармоннинг амал қилишини тўхтатиб туришга қарор қилди. Даъво ҳомиладор аёл, икки ота-она ва уларнинг чақалоқлари номидан киритилган.
У Трампнинг АҚШда ноқонуний ёки вақтинча яшовчи ота-оналардан туғилган болаларни фуқароликдан маҳрум қилиш ҳақидаги январь ойидаги фармонига қарши қаратилган. Даъвогарларни Америка фуқаролик эркинликлари иттифоқи (АCЛУ) ва бошқа ҳуқуқ ташкилотлари ҳимоя қилмоқда.
Масала АҚШ Конституциясининг 14-тузатишига бориб тақалади. Унда қуйидагича ёзилган:
“Қўшма Штатларда туғилган ёки натурализация қилинган ва унинг юрисдикцияси остида бўлган барча шахслар АҚШ фуқароларидир”
Трамп маъмурияти бу банддаги “унинг юрисдикциясига бўйсунадиган” деган ибора АҚШ ҳудудига ноқонуний кирган аёллардан туғилган чақалоқларга фуқаролик бермаслик ҳуқуқини беради, деб ҳисоблайди. Бу эса бир асрдан ортиқ давомида амал қилиб келаётган қонуний тамойилга зиддир.
Ҳукумат адвокатлари фикрича, илгари қабул қилинган талқинлар ноқонуний иммиграцияни рағбатлантирган ва бу АҚШнинг суверенитети, миллий хавфсизлиги ҳамда иқтисодий барқарорлигига путур етказган.
Изоҳ (0)