2024 йилда Ўзбекистон фуқаролари Шенген визасини олиш учун 58 691 та ариза топширган. Бу сўнгги ўн йилдаги энг юқори кўрсаткич бўлиб, 2023 йилга нисбатан 26,2 фоизга кўпдир. Бу ҳақда расмий статистикага асосланиб, СченгенVisaИнфо портали хабар бермоқда.
Топширилган аризалар сони бўйича Ўзбекистон жаҳон рейтингида 35-ўринни эгаллаган.
Мурожаатларни тасдиқлаш кўрсаткичи анча юқори бўлиб, аризачиларнинг деярли 88 фоизи ижобий жавоб олган. Жами 51 604 та виза берилган. Бу 2023 йилга нисбатан 33 фоиз кўпдир.
Ўзбекистон фуқароларининг Шенген визасига бўлган қизиқиши пандемия йилларида энг паст даражада бўлган. 2020 ва 2021 йилларда мос равишда атиги 6770 ва 8929 та ариза топширилган.
2024 йилда энг кўп 19 329 та мурожаат Германия консулхоналарига келиб тушган. Шундан 15 525 та ариза тасдиқланган. Шу билан бирга, Швейцария йил давомида Ўзбекистон фуқароларидан бирорта ҳам мурожаат қабул қилмаган.
Польша яна бир бор энг кўп рад этадиган давлат мақомини олган. Мамлакат консулхонаси ўзбекистонликлардан келиб тушган барча аризаларнинг 32,88 фоизини рад этган.
2024 йил 11 июнгача Шенген визаси учун ариза топшириш нархи 80 евро эди. Ўтган йил давомида Ўзбекистон фуқаролари виза йиғимлари учун 4 695 280 евро сарфлаган, шундан тахминан 740 000 евро рад этилган аризаларга тўғри келади.
Умуман олганда, сўнгги ўн йил ичида Европа Иттифоқи Ўзбекистон фуқароларидан виза йиғимлари орқали деярли 26 миллион евро даромад олган.
Изоҳ (0)