Ўзбекистон фуқаролари Словакияга доимий ишга таклиф қилинмоқда. Бу ҳақда Миграция агентлиги хабар берди.
Қайд этилишича, 18–45 ёш орасидаги эркак талабгорларга Марказий Европадаги мамлакат автомобиль заводларида кара ҳайдовчилик (погрузчик) бўйича иш ўринлари мавжуд.
“Жами 150 та иш ўрни бор. Ойлик 950 евро (1026 доллар), иш ҳажмига қараб турли бонуслар ҳам берилади. Ҳафтада 5 кун иш, (3 та смена). Ходимдан тиббий суғурта қилинади”, дея хабар берган агентлик.
Ишчи карада турли ҳажмдаги автомобиль эҳтиёт қисмларини ташиш ва юклаш керак бўлади. Синов муддати биринчи уч ойни (ойлик сақланган ҳолда) ташкил этади.
Номзоддан қуйидагилар талаб этилади:
- рус тилини ёзма ва оғзаки билиш;
- “Б” тоифадаги ҳайдовчилик гувоҳномасига эга бўлиш ва автокарада ишлаш бўйича камида 6 ойлик тажриба;
- Ўзбекистон ёки Шенген ҳудудида судланмаганлик;
- икки босқичли (назарий ва амалий) имтиҳонлардан муваффақиятли ўтиш.
Ишчи виза, кетишдан олдинги ўқув курслари ҳамда Словакияга бориш харажатлари номзод томонидан қопланади. Агентликка кўра, дастлабки саралашдан ўтган фуқаролар йўл ҳаракати қоидалари бўйича тест ҳамда карада амалий машқларни бажаради. Ҳозиргача мазкур йўналишдаги иш ўринлари учун 62 нафар номзод қизиқиш билдирган.
Маълумот учун, Словакиянинг доимий аҳолиси сони 5,5 миллион кишидан иборат. 2024 йилда мамлакат ялпи ички маҳсулоти 132,9 миллиард долларни ташкил этган. Бу миқдор аҳоли жон бошига қарийб 24 163 доллардан тўғри келади.
Таққослаш учун, айни пайтда Ўзбекистон аҳолиси 37,5 миллион нафардан ортган. 2024 йилда республика ялпи ички маҳсулоти ҳажми 115 миллиард долларни ташкил этган. Бу аҳоли жон бошига 3063 доллар дегани.
2024 йилда Ўзбекистонга хорижий давлатлардаги меҳнат муҳожирлари 14,8 миллиард доллар пул юборган. Бу 2023 йилдагидан 3,4 миллиард долларга кўп. Маблағларнинг 77 фоизи Россиядан (11,5 миллиард доллар) келиб тушган. Шу билан бирга, Қозоғистондан 795 миллион доллар, АҚШдан 577 миллион доллар, Жанубий Кореядан 534 миллион доллар, Туркиядан 405 миллион доллар, Буюк Британиядан 135 миллион доллар ўтказилган.
Изоҳ (0)