Самарқанд вилоятида АҚШга ноқонуний йўллар билан юборувчи гуруҳлардан яна ўндан ортиқ киши жабрланди. Бу ҳақда ЎзА хабар берди.
Хабарга кўра, М.Х. ва Ш.Ш. узоқ вақтдан буён шу йўл орқали катта миқдорда маблағларни ўзлаштириб келган. Улар Ж.Х.нинг ишончига кириб, Европа давлатларидан бирига “Шенген” кириш визасини расмийлаштириш ва Тошкент–Испания–Мексика–АҚШ йўналиши орқали Америкага юборишни ваъда қилган. Шундан сўнг ундан 27 минг долларни талаб қилган. Улар фуқародан дастлаб 10 минг доллар, Мексиканинг АҚШ билан чегарасига етиб борганидан сўнг 17 минг доллар бериши зарурлигини билдирган.
Қайд этилишича, Давлат хавфсизлик хизмати вилоят бошқармаси ва Ички ишлар бошқармаси ходимлари ҳамкорлигида амалга оширилган тадбир натижасида М.Х. ҳамда Ш.Ш. фуқаро Ж.Х.дан 10 минг АҚШ долларини олаётган вақтида ашёвий далиллар билан қўлга олинди. Тинтув вақтида уларнинг ноқонуний ҳаракатларидан жабрланган 13 нафар фуқаронинг ҳужжатлари (8 та хорижга чиқиш паспорти, 2 та биометрик паспорт, бир дона ID-карта, 2 та туғилганлик ҳақида гувоҳнома ва бир дона никоҳ гувоҳномаси), шунингдек, яна бир фуқаро Н.Р.ни АҚШга юбориш эвазига 22 500 доллари миқдоридаги пул маблағларини олгани тўғрисида тилхат топилиб, просессуал тарзда расмийлаштирилди.
Маълум қилинишича, ушбу шахсларга нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ Самарқанд вилоятида фуқароларни Мексика орқали АҚШга жўнатмоқчи бўлган жиноий гуруҳнинг яна бир аъзоси қўлга тушгани хабар қилинганди.
Изоҳ (0)