Россия Федерацияси ҳукумати COVID-19 пандемияси туфайли хорижликлар учун мамлакат ҳудудига киришни чеклаб, ўз чегараларини ёпишга қарор қилди. Бу ҳақда Россия ҳукуматининг расмий сайтида хабар қилинган.
Хабарга кўра, бошқа давлатлар фуқаролари учун Россия ҳудудига кириш 18 мартдан 1 майга қадар ёпиқ бўлади. Бу ҳақда Россия бош вазири Михаил Мишустин Беларусь, Озарбайжон, Арманистон, Қозоғистон, Қирғизистон, Тожикистон бош вазирлари, шунингдек, Ўзбекистон бош вазири Абдулла Арипов билан телефон мулоқотларида келишиб олган.
Чекловлар дипломатлар, самолётлар экипажларининг аъзолари, кема ва поездларда ишловчи инсонлар, шунингдек, транзит авиайўловчилар ва Россияда яшаш рухсатномасига эга хорижликларга тааллуқли эмас. Жисмоний шахслар Россияга фақат яқин қариндошларининг вафоти муносабати билан маракаларда иштирок этиш учун келиши мумкин.
16 мартдан Канада ҳамда Малайзия давлатлари ҳам чегаралари ёпилганини эълон қилган. Евроиттифоқ раҳбарияти худди шундай қарорлар унга аъзо давлатлар ҳудудида, шунингдек, Шенген зонасида ҳам қўлланиши мумкинлигини маълум қилган.
Аввал «Аэрофлот» компанияси Ўзбекистонга парвозларни тўхтатгани, Ўзбекистон ҳам коронавирус сабаб авиа ва автоқатновларни тўхтатгани, чет элда қолган ватандошлар чартер рейсларида қайтарилиши ҳақида хабарлар берилган. Россияда 13 март, жума куни, италияликлар ва Апенин яриморолидан келган бошқа хорижликларга мамлакат ҳудудига кириш вақтинча тақиқланган.
Изоҳ (0)