Нидерландия ҳукумати 9 декабрь куни қироллик чегарасида назоратни жорий қилади, бу назорат олти ой давомида амал қилади. De Telegraaf газетаси хабар беришича, бу ҳақда миграция ва бошпана бериш масалалари вазири Марёлен Фабер маълум қилди.
Унинг аниқлик киритишича, бу вақтинчалик чора бўлиб, чегара ҳудудларидаги иқтисодий ўсиш ва ҳаракатга имкон қадар камроқ халақит бериши керак. Фабернинг сўзларига кўра, янги чоралар ноқонуний миграцияга қарши қаратилган.
Вазир Европа комиссияси, Европа иттифоқи кенгаши, Европа парламенти ва Европа мамлакатларини қарор ҳақида хабардор қилди.
Қайд этилишича, чегарада назоратни Нидерландия қироллик ҳарбий полицияси амалга оширади. Вазирнинг сўзларига кўра, расмийлар вақт ўтиши билан текширувлар сонини кўпайтириш ниятида.
Аввалроқ Нидерландия расмийлари Шенген чегара кодексининг жамоат тартиби ёки ички хавфсизликка жиддий таҳдидлар туғилганда чегара назоратини жорий этиш имконини берувчи 25-моддасидан ноябрь ойи охиригача фойдаланиш ниятида эканлигини маълум қилган эди.
Футбол учрашувидан кейинги можаро
8-жума куни Нидерландия пойтахти Амстердамда маҳаллий “Аякс” клуби Исроилнинг “Маккаби” жамоасини қабул қилиб, 5:0 ҳисобида ғалаба қозонди.
Исроилдан мазкур ўйинга келган мухлислар учрашув вақтидаёқ безориликни бошлаб, Испаниядаги сув тошқини қурбонлари хотирасига сақланган 1 дақиқалик сукутни бузиб, ҳуштакбозлик қилишди.
Кейин эса улар кўчаларни кезиб, бинолардан бирига осилган Фаластин байроғини юлиб олишаётгани акс этган видео тарқалди.
Шундан сўнг Амстердамдаги мусулмон бўлган мигрантлар ва Исроилдан келган мухлислар ўртасида жанжаллар юзага келди.
Исроил ҳукуматининг вазиятга муносабати
Исроил бош вазири Биньямин Нетаньяху Нидерландия ҳуқуқни муҳофаза қилиш органларини исроилликларни ҳимоя қилиш бўйича тезкор ва қатъий чоралар кўришга чақирди.
Исроил Ташқи ишлар вазирлигига кўра, тартибсизликларда камида 10 нафар исроиллик жароҳат олган. Фуқароларга вазият барқарорлашгунча меҳмонхоналардан чиқмаслик тавсия этилган.
Исроил оммавий ахборот воситалари ёзишича, бир неча мухлис оғир жароҳат олган, баъзиларининг паспортлари ўғирлаб кетилган. Амстердам полицияси безориликда иштирок этган ўнлаб шахсларни қўлга олган.
Исроил фуқароларини Амстердамдан эвакуация қилиш учун иккита самолёт жўнатган.
Изоҳ (0)