Бугун, 12 июль куни Тошкент шаҳрида уй ҳовузида етти бола чўккани ва улардан икки нафари вафот этгани ҳақида хабарлар тарқалди. Бош прокуратура ҳолат юзасидан расмий ахборот бериб, аслида бир бола ҳалок бўлганини маълум қилди.
Бош прокуратурага кўра, Республика шошилинч тиббий ёрдам марказига 2025 йил 12 майдан 10 июлгача Тошкентнинг турли ҳудудларидан етти нафар бола чўкиши билан боғлиқ мурожаатлар келиб тушган.
Болалардан тўрт нафари соғайиб, уйига жавоб берилган. Икки нафари ҳозирча шифохонада, улардан бири оғир аҳволда. Бир нафар бола эса вафот этган. Маълум қилинишича, ҳалок бўлган бола қаровсиз қолиб, хонадондаги бассейнга тушиб кетган. У шифохонага етказилганда, биологик ўлим ҳолати қайд этилган.
Ҳозирда ҳолат юзасидан Чилонзор тумани прокуратураси томонидан терговга қадар текширув ҳаракатлари олиб борилмоқда.
Аввалроқ май ойида Самарқанд вилояти Пахтачи туманида икки нафар ўқувчи ҳовузда чўкиб, ҳалок бўлгани хабар қилинганди. Яна бир ҳолат Фарғонада юз беганди — уч нафар вояга етмаган бола сунъий сув ҳавзасига чўкиб кетган.
Шу билан бирга, Тошкентдаги Бўрижар каналига тушиб кетган қизни қутқарган эркакнинг ўзи ҳалок бўлганди. Андижон вилоятининг Олтинкўл туманида саккиз ёшли икки бола ҳовузда чўкиб, вафот этганди.
Изоҳ (0)