Европа мамлакатлари узоқ вақт давомида Африкани талаб келган ва энди улар Африка мамлакатларининг ривожланишига ҳисса қўшишлари шарт. Бу ҳақда Жанубий Африка Республикаси президенти Сирил Рамапоса Австрия президенти Александр Ван дер Белленнинг мамлакатга давлат ташрифи пайтида айтди.
“Европанинг катта қисми Африкадаги ресурсларни қазиб олиш орқали ҳақиқатан ҳам катта тараққиётга эришгани боис энди Европа Африка қитъасини ривожлантириш жараёнида иштирок этиши ва ўтмишдаги каби ғайрат кўрсатиши керак, деб ҳисоблайман. Бироқ бу сафар — савдо қилиш, сармоя киритиш ва Африка қитъасини ривожлантириш йўлида”, деди у.
Ўз навбатида, Ван дер Беллен Австриянинг Африкада ҳеч қачон мустамлакалари бўлмаганини таъкидлаган.
“Яхшими ёки ёмонми билмайман-у, лекин Австрия Африкада мустамлакачи давлат бўлмаган”, деди у.
Ван дер Белленнинг қўшимча қилишича, ҳозирда Франция Африкада жиддий муаммога дуч келмоқда, чунки Мали, Нигер ва Буркина Фасода унинг манфаатларига путур етган.
Икки йил олдин Жанубий Африка Республикаси ва Гана Ғарбий Европа давлатлари ва АҚШдан Африкага қул савдоси учун товон ундириш мақсадида бутун дунё бўйлаб кампания бошлаганди. Уларнинг режаларига кўра, товон пули миқдори музокаралар давомида белгиланиши керак.
1999 йилда Гана пойтахти Аккрада бўлиб ўтган Африка мамлакатларига мустамлакачилик ва қул савдосидан етказилган зарарни аниқлаш бўйича махсус комиссия конференциясида 777 триллион доллар миқдоридаги сумма эълон қилинди.
Изоҳ (0)