АҚШ президенти Жо Байден мамлакатда қуллар озод қилинган кунни федерал байрам сифатида тан олиш тўғрисидаги фармонни имзолади. Байрам 19 июнь куни нишонланади. Бу ҳақда Оқ уй веб-сайтига таяниб «РБК» хабар берди.
«Бугун биз 19 июнь кунини федерал байрам деб эълон қиламиз. Ушбу кунни ёдга олиш учун Конгрессдаги икки партиянинг қўллаб-қувватлови билан биз демократлар ва республикачилар сифатида бир сафда турганимиздан мамнунман. Умид қиламанки, бу ўзаро муносабатларимизда ўзгариш бошлаб беради», — деди Байден.
Байден «буюк халқлар уларнинг энг аламли лаҳзаларини эътиборсиз қолдирмаслигини» таъкидлади. Бу йил 19 июнь шанба кунига тўғри келгани сабабли АҚШда дам олиш куни 18 июнга кўчирилди.
Янги байрам Миллий мустақиллик куни (National Independence Day) деб номланди. Бунга қадар ҳам АҚШнинг 4 июлда нишонланадиган Мустақиллик куни (Independence Day) мавжуд. Ушбу санада 1776 йилда АҚШнинг Буюк Британиядан мустақиллиги тўғрисидаги декларация қабул қилинган.
АҚШда қулликнинг тугатилишига қадам мамлакатнинг 16-президенти Авраам Линколн 1863 йил 1 январда қулларни озод қилиш тўғрисидаги қарорини эълон қилиши билан қўйилди. Жанубий штатлар бунга норози бўлган, уларнинг қаршилиги 1865 йилгача давом этган фуқаролар урушига олиб келди. 1865 йил декабрда бутун мамлакат бўйлаб қуллик бекор қилиниб, Конституцияга 13-тузатиш қабул қилинди.
Байден федерал байрам сифатида танлаган 19 июнь куни қулликнинг Техас штатида бекор қилиниши билан боғлиқ. Штат қуллик бекор қилинишини 1865 йил 19 июнь куни Жанубий Конфедерациядан энг охирги бўлиб тан олган.
Изоҳ (0)