Шу йилнинг апрель ойида актриса Муҳаббат Абдуллаева ижтимоий тармоқлар орқали ёлғиз қизи Карина Таиландда даҳшатли автоҳалокатга учрагани ва уни даволаш учун катта маблағ талаб этилаётганини айтиб, халқдан ёрдам сўраганди.
Мотоцикл иштирокидаги авария шу йилнинг 31 март куни Таиландда содир бўлганди. Тўрт ойлик тиббий муолажалардан сўнг Каринанинг аҳволи қониқарли. У яқин кунларда Тошкентга қайтиб келади.
— Даволаниш учун катта маблағ сарфланди. Қизим анча вақт комада эди. Касалхонанинг кунлик тўлови 955 АҚШ доллари бўлгани учун уни кундузги даволанишга ўтказишга мажбур бўлдик. Ўзим Таиландга боролмадим, қўлдан келганча ишладим, меҳрибон мухлисларим жўнатган пулларни Таиланддаги дўстларига юбориб турдим. Қизимни уйига олиб чиқиб, коляскали махсус скутерда ҳар куни даволанишга олиб боришди. Улардан миннатдорман, катта ёрдам беришди. Таиланднинг ўзида 15 минг евро хайрия пули йиғилди. Мухлисларим орасида шунчалик қадрли эканимни бошимга иш тушганида чуқурроқ ҳис қилдим. Улар катта ёрдам беришди, ҳозир ҳам қайси даврага кириб бормай албатта, қизимнинг аҳволини сўрашади. Таиланддан кейин қизимни Германияга олиб боришди. У ерда ҳам бир муддат даволанди, энди Тошкентга келади. Аммо даволаш ишлари якунлангани йўқ. Қизим жуда асабий бўлиб қолган, бундан ташқари кўриш қобилияти ҳам анчайин сусайган. Кучли стресс таъсирида безовталаниб бирдан уйғониб кетади, васвасага тушади. Насиб қилса, Тошкентга келганидан кейин бу ерлик шифокорларга ҳам кўрсатмоқчиман, — дейди актриса Муҳаббат Абдуллаева.
Изоҳ (0)