Солиқ қўмитасининг my3.soliq.uz маълумотлар базасида техник носозлик юз берди. Оқибатда 30,1 минг солиқ тўловчининг ҳисобидан асоссиз равишда жами 399,3 миллиард сўм маблағ ечиб олинган. Бу ҳақда 13 август куни қўмита ахборот хизмати хабар берди.
Маълум қилинишича, солиқ тўловчилардан қуйидаги миқдорлардаги пуллар асоссиз ечиб олинган:
- 7 203 нафар солиқ тўловчидан – 100 минг сўмгача;
- 10 165 нафар солиқ тўловчидан – 100 минг сўмдан 1 млн сўмгача;
- 8 270 нафар солиқ тўловчидан – 1 млн сўмдан 10 млн сўмгача;
- 3 780 нафар солиқ тўловчидан – 10 млн сўмдан 100 млн сўмгача;
- 672 нафар солиқ тўловчидан – 100 млн сўмдан 1 млрд сўмгача;
- 10 нафар солиқ тўловчидан – 1 млрд сўмдан ортиқ маблағлар ечиб олинган.
Қўмита солиқ органлари маблағларни бугунги кун охиригача солиқ тўловчиларнинг ҳисоб рақамларига қайтаришиши билдирган.
“Солиқ тўловчиларнинг ҳисобидан ечиб олинган маблағларни қайтариш бўйича тегишли хулосалар тўлиқ Ғазначиликка юборилган. Маблағларни қайтариш автоматик тарзда амалга оширилади, солиқ тўловчилардан ёзма мурожаат талаб этилмайди. Шу билан бирга, тижорат банкларида ҳали ижро қилинмаган инкассо топшириқлари ҳам қайтариб олиниши таъминланди”, дейилган манбада.
Қайд этилишича, соат 18:00 ҳолатига кўра, 20 608 та субъектга 274,7 млрд сўм қайтарилиши таъминланган.
Изоҳ (0)