Камбоджа Таиланд билан чегара можаролари бўйича Халқаро судга шикоят қилади. Яқинда икки мамлакат ўртасида чегарада тўқнашув бўлиб, унда Камбоджа аскари ҳалок бўлган эди. Бу ҳақда Arab News хабар берди.
“Умид қиламизки, Таиланд ушбу масалани Халқаро судга топширишга рози бўлади ва яна қуролли қарама-қаршиликка йўл қўйилмайди”, деди Комбоджа бош вазири Хун Манет.
Камбоджа агар Таиланд бунга рози бўлмаса ҳам шикоят қилишини билдирди. Жануби-шарқий осиёлик қўшнилар ўртасидаги ҳарбий тўқнашувлар 2008 йилда бошланган ва бир неча йил давомида вақти-вақти билан тўқнашувлар бўлиб турган. Оқибатда камида 28 киши ҳалок бўлган. Уларнинг энг сўнггиси 28 май куни содир бўлганди. Ҳодисада Камбоджа, Таиланд ва Лаос ўртасидаги қўшма чегара ҳудуди — Зумрад учбурчак деб номланувчи жойда камбоджалик аскар ҳалок бўлган эди.
Эртаси куни Камбоджа ташқи ишлар вазирлиги Таиланднинг Пномпен шаҳридаги элчихонасига хат йўллаб, асоссиз ҳужум бўйича зудлик билан тергов ўтказишни талаб қилган. Мамлакат ҳарбийлари учрашиб, кескинликни юмшатишга келишиб олган. Таиландга кўра, яқин икки ҳафта ичида Қўшма чегара қўмитаси йиғилиб, муаммо ҳал қилинади.
Изоҳ (0)