Ўзбекистон элчихонаси кўмагида Озарбайжонда оғир аҳволда қолган ўзбекистонлик ватанга олиб келинди, деб хабар бермоқда “Дунё” ахборот агентлиги.
Дипломатик ваколатхона маълумотларига кўра, М.Ж. оғир дардга чалингани (инсульт) муносабати билан тиббий ёрдам олиш ва Ўзбекистонга қайтиш учун амалий ёрдам сўраб мурожаат қилган. Фуқаро билан ўтказилган мулоқотда маълум бўлишича, у 10 йил давомида ўғли Ж.Ж. билан Озарбайжонда ноқонуний яшаб келган.
Беморга тезкорлик билан тиббий ёрдам кўрсатиш мақсадида шифохонага ётқизиш чоралари кўрилган. Бироқ тиббий суғурта ва зарур ҳужжатлар йўқлиги сабабли турли муаммолар келиб чиққан. Якунда бемор ва унинг ўғли билан келишган ҳолда уларни Ўзбекистонга қайтариш тўғрисида қарор қабул қилинган.
Озарбайжондаги фаол ватандошлар кўмагида М.Ж. ва унинг ўғлига Боку—Тошкент йўналишидаги самолётга чипта сотиб олинган ва улар 29 март куни Ўзбекистонга кузатиб қўйилган.
Шу каби ҳолат Таиландда ҳам кузатилганди. 30 март куни инсультга чалинган ўзбекистонлик ватанга қайтарилганди. Фуқаро Таиландга ишлаш мақсадида келган, аммо тиббий суғурта олмаган, шунингдек, иш берувчи билан меҳнат шартномасини ҳам тузмаган. Бундай ҳолатлар кўпайиб бораётгани сабаб Ўзбекистоннинг Бангкокдаги Бош консулхонаси Ўзбекистон фуқароларига чет элга саёҳат қилиш ёки ишлаш учун кетаётганда тиббий суғурта олиш, шунингдек, иш берувчи билан меҳнат шартномасини тузиш зарурлигини билдирди.
Изоҳ (0)