Ёзги мавсумда табиат бағрида вақт ўтказаётган болаларда ари чақиши билан боғлиқ ҳолатлар тез-тез учрайди. Бу ёқимсиз ҳолат кичик ёшдаги болалар учун жуда хавотирли бўлиши мумкин. Бундай вазиятда муҳим бўлган нарса — саросимага тушмасдан, тўғри ёрдам кўрсатишдир. Россиялик педиатр Анна Паршинова болани ари чақиш оқибатидаги оғриқни енгиллаштириш, аллергик реакция эҳтимолини камайтириш ва асоратларнинг олдини олишга ёрдам берадиган оддий, аммо самарали чораларни айтди.
1. Болани ҳашарот чаққанидан сўнг, энг аввало, терида ниш (яъни чақиш пайтида қолиб кетган игна) қолган-қолмаганини текшириш керак. Асаларилар ниш қолдириши мумкин, бироқ арилар одатда бундай қилмайди. Агар ниш қолган бўлса, уни эҳтиёткорлик билан, босмасдан, пинсет ёрдамида олиб ташланг. Босиш яллиғланиш ва оғриқни кучайтириши мумкин, шунинг учун нишни оҳиста кўтариб, секин чиқариш муҳим.
2. Ниш чиқарилгач, чаққан жойни антисептик восита билан тозалаш керак. Бу учун водород пероксид, хлоргексидин ёки спиртли салфетка мос келади. Бундай антисептиклар яра юқтириб олиш хавфини камайтиради ва яллиғланишнинг олдини олади.
3. Шиш ва оғриқни камайтириш учун чаққан жойга совуқ компресс қўйинг. Бу совуқ сувга намланган мато ёки сочиққа ўралган муз бўлиши мумкин. Аммо музни тўғридан-тўғри терига қўйиш мумкин эмас. Бу совуқ уриш (музлаш) хавфини туғдиради.
4. Агар болада аллергик реакция — масалан, қичишиш, қизариш ёки шиш пайдо бўлса, унга ёшига мос антигистамин (аллергияга қарши) дори бериш мумкин. Бу дори аллергия белгилари ва яллиғланишни камайтиради.
5. Агар бола оғриқдан шикоят қилса, ёши учун мос дозада парацетамол бериш мумкин. Бу оғриқни енгиллаштиради ва ноқулайликни камайтиради.
Изоҳ (0)