O‘zbekistonlik voyaga yetmagan aka-uka xorijda qarovsiz qoldirilgani aniqlandi, deb xabar bermoqda Ijtimoiy himoya milliy agentligi.
Keltirilishicha, o‘z ota-onasi tomonidan chet elda qarovsiz qoldirilgan aka-ukalar aniqlanib, O‘zbekistonga qaytarildi. Vatanga qaytgan bolalar Buxoro tumani “Inson” ijtimoiy xizmatlar markazi tomonidan nazoratga olindi.
Markazning huquqiy masalalar bo‘yicha ekspert-maslahatchisi tomonidan onalik huquqidan mahrum qilish va aliment undirish yuzasidan fuqarolik sudiga da’vo arizasi kiritildi.
Bolalar esa Peshku tumanidagi Oilaviy bolalar uyiga joylashtirildi. Ularning ta’lim olish huquqini ta’minlash va ijtimoiy moslashuvini kuchaytirish maqsadida qo‘shimcha fan to‘garaklariga jalb qilindi.
Xorijdan O‘zbekistonga qaytarilgan bolalar
2024-yil avgust-sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi. O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
Izoh (0)