Бош консулхона томонидан Туркияда оғир аҳволда қолган вояга етмаган фуқаро Ўзбекистонга қайтарилгани маълум қилинди.
Келтирилишича, фуқаро Т.О.нинг онаси 2015 йилда ишлаш мақсадида Туркияга келган ва Истанбул шаҳрига жойлашган. Унинг онаси Туркия фуқароси билан танишиб, шаръий никоҳ асосида турмуш қурган ва унинг уйида яшашни бошлаган.
Ўгай ота вояга етмаган қизга нисбатан жинсий тажовуз қилган. Шу сабабли 2017 йилда Т.О. Истанбулдаги болалар уйига жойлаштирилган. Жорий йил февраль ойида Т.О.нинг опаси судга қилган мурожаати асосида у болалар уйидан озод қилинган.
Бироқ Т.О.нинг опаси кейинчалик Туркия полициясига куч ишлатгани учун қамоққа тушган ва вояга етмаган фуқаро яна қаровсиз қолган.
Бош консулхона “Елкадош” ва “Ўзбек хотин-қизлар ҳуқуқларини ҳимоя қилиш” жамиятлари билан ҳамкорликда мазкур фуқаронинг Ўзбекистонга қайтарилишини ва уни қонуний вакилларига топширилишини ташкил этди.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
Хориждан Ўзбекистонга қайтарилган болалар
2024 йил август сентябрь ойларида хорижда ота-она қарамоғидан маҳрум бўлган 34 нафар бола Ўзбекистонга қайтарилганди. Октябрь ойида Россияда қаровсиз қолган 8 ойлик чақалоқ Ўзбекистонга, ота-онаси бағрига қайтарилди. Москвадаги вояга етмаган ҳуқуқбузарларни вақтинча сақлаш марказидан 4 нафар бола Ўзбекистонга олиб келинди. Ўша ойда Туркияда ота-онасининг қаровисиз қолиб кетган уч нафар вояга етмаган бола Ўзбекистонга қайтарилди. Ноябрда Дубайни тарк этиш тақиқланган ўзбекистонлик болага ватанга қайтишига ёрдам берилди. Декабрда Россияда ота-она қарамоғисиз қолган 15 нафар бола Ўзбекистонга қайтарилди.
Шунингдек, Россиянинг Тива Республикаси Оқ Довурак шаҳрида вақтинча ишлаётган ва ҳужжатларини йўқотган тўрт нафар Ўзбекистон фуқароси ватанга қайтарилганди.
Изоҳ (0)