Интернетда Россия ва Саудия Арабистонига қарши қаратилган жосуслик вируси пайдо бўлди. Бу ҳақда Financial Times газетасига асосланиб, «Kun.uz» хабар бермоқда.
Антивирус дастурларини ишлаб чиқариш бўйича жаҳондаги етакчи ширкатлардан бири, Американинг Symantec компанияси Regin вирусини ҳозирги кунда маълум бўлган жосуслик вируслари орасида энг мукаммали деб атади.
Symantec янги Regin вирусини Эрон ядровий дастури ривожини сезиларли секинлаштирган Stuxnet вируси билан таққослаган. Бироқ, Symantec мутахассисларининг фикрича, Regin вируси Stuxnet’дан-да мукаммалроқ бўлиши мумкин.
«Stuxnet’ни ёдга солувчи бу вирус ахборот тўплаш билан шуғулланади, уни жаҳондаги энг зарарли вирус деб аташмоқда, у Россия ва Саудия Арабистонининг телекоммуникация компанияларини нишонга олган»», – деб ёзади Financial Times.
Газетанинг қайд этишича, ушбу вирус Ғарб мамлакатларидан бирининг махсус хизматлари томонидан ишлаб чиқилган ва бошқарилаётган бўлиши мумкин. «Янги вирус 2010 йили Эрон ядровий дастурини йўққа чиқариш учун АҚШ ва Исроил ҳукуматига ишловчи хакерлар томонидан тайёрланган Stuxnet вируси қайсидир жиҳатлари бўйича кучлироқ», – дейилади мақолада.
Symantec’нинг қайд этишича, Regin вируси асосан Россия, Саудия Арабистони, шунингдек, Мексика, Ирландия ва Эрондаги алоқа компаниялари ва интернет-провайдерлар фаолиятига таъсир қилган.
Вирус корпоратив тизимларни қай йўсинда бузишини мутахассислар ҳозирча аниқлаганича йўқ, бироқ, уларнинг фикрича, Regin жаҳоннинг етакчи алоқа операторларига уланган мобил телефонларни эшитиб бориш, шунингдек, Microsoft компанияси серверларидаги электрон почтани кузатиб бориш имконини беради.
Изоҳ (0)