Жефф Безос ва Лорен Санчеснинг ҳашаматли тўйи Венецияда кескин эътирозларга сабаб бўлди. Шаҳарнинг кўплаб аҳолиси бу тадбирга салбий муносабат билдирмоқда, бу эса туристлар оқимига қарши норозиликлар кучайган даврга тўғри келмоқда.
Тўй 24 июнь куни бошланиб, уч кун давом этади, аммо маҳаллий аҳоли миллиардер тўйи учун айнан Венеция танланганидан мутлақо норози. Тhе Cut нашрига кўра, шаҳарда аллақачон оммавий норозилик акциялари бўлиб ўтмоқда.
Намойишлар тўй маросимининг аниқ манзили ошкор этилиши билан бошланган. Rialto кўпригига “Безосга бу ерда жой йўқ” деган ёзувли улкан баннер осилган. Шунингдек, Сан Жоржо Мажоре минорасида миллиардернинг фамилияси қизил чизиқ билан чизилган плакатлар пайдо бўлган.
Шаҳар аҳолиси туристлар оқими ортидан юзага келадиган тирбандлик ва кундалик ҳаётдаги қийинчиликлардан хавотирда. Венеция ҳозирда бошқа кўплаб Европа шаҳарлари каби “овертуризм”, яъни ортиқча сайёҳлар босими муаммосини бошидан кечирмоқда. Аҳолининг фикрича, Ким Кардашьян, Иванка Трамп оиласи, Леонардо Ди Каприо ва бошқа машҳурлар иштирокидаги бу тўй шаҳар учун ҳақиқий фалокатга айланиши мумкин.
Шу сабаб намойишчилар тўйнинг ўтказилишига йўл қўймаслик ниятида. Миш-мишларга қараганда, тадбир илгари хайрия мақсадида фойдаланилган Scuola Grande Della Misericordia биносида ўтказилиши мумкин. Намойиш ташкилотчиларидан бири Федерика Тонинелло бу хабарга муносабат билдирар экан, The New York Times нашрига қуйидагича изоҳ берган:
“Безос ҳеч қачон Misericordia биносига кира олмайди. Биз кўчалар бўйлаб саф тортамиз, каналларни қутқарув ҳалқалари ва қайиқларимиз билан тўсиб қўямиз”.
Намойишчиларнинг эътирозлари фақат тўйга эмас, балки шаҳар ҳокимиятига, хусусан, Венеция мерига ҳам қаратилган. У 2024 йилдан буён коррупция айблови билан тергов остида. Намойишчиларнинг таъкидлашича, у “шаҳарни Безосга сотган”, илгари эса шахсий манфаатлари учун инвесторларга ерлар бериб келган.
Европанинг бошқа шаҳарларида ҳам бу каби чиқишлар бўлиб ўтмоқда. Тhе Cut нашрига кўра, 16 июнь куни Париждаги Лувр ходимлари иш жойларини тарк этиб, чипта олган меҳмонларни ичкарига киритмаган. Бу ҳаракат ҳам ҳаддан ташқари кўп сонли сайёҳларга қарши норозилик сифатида баҳоланган.
Барселона, Италиянинг Генуя шаҳри, Лиссабон, Ибиза ва бошқа жойларда ҳам туризмга қарши намойишлар бўлиб ўтди. Сан Себастьянда ўтказилган норозиликлардан бирини уюштирган Асер Басурто The New York Times’га берган интервьюсида қуйидагиларни айтди:
“Биздаги муаммо сайёҳларнинг кўплигида эмас. Асл айбдорлар — туризм ниқоби ортида яшириниб, маҳаллий аҳоли ҳаёти ва уй-жой бозори ҳисобидан фойда кўраётган спекулянтлар ва эксплуататорлардир”.
Таъкидлаш жоизки, туризм Испания ялпи ички маҳсулотининг 12 фоизини, Италияда эса 10 фоизини ташкил этади. Шунга қарамай, фуқаролар фикрича, бу модел иқтисодий ўсиш эмас, балки уй-жой тақчиллиги каби муаммоларни келтириб чиқармоқда.
Изоҳ (0)