2020 йиллар бошидан дунёнинг энг бой ва энг камбағал одамлари даромадлари ўртасидаги тафовут кескин ошди: сайёрамиз аҳолисининг энг камбағал 60 фоизи янада қашшоқлашди, энг бой беш киши эса янада бойиб кетди.
Тhе Guardian нашри Oxfam халқаро ташкилоти ҳисоботига таяниб ёзишича, 2020 йилдан буён Ер юзидаги энг бадавлат беш кишининг бойлиги икки баробарга ошиб, 869 миллиард долларни ташкил қилди. Шу билан бирга, дунё аҳолисининг энг кам даромадли 60 фоизи – 5 миллиардга яқин аҳоли янада қашшоқлашди.
Oxfam маълумотларига кўра, ўта бой миллиардерлар ва дунёнинг қолган аҳолиси даромадлари ўртасидаги катта тафовут ўсишда давом этади. 2020 йилдан бери барча миллиардерларнинг умумий бойлиги 3,3 триллион долларга ошган. Ўта бой бизнесменларнинг даромадлари глобал инфляциядан уч баробар тезроқ ўсди.
Келгуси ўн йил ичида сайёрада триллион доллардан ортиқ маблағга эга одам бўлади. Шу билан бирга, глобал қашшоқлик муаммоси камида яна 229 йил давомида ҳал этилмайди. 52 мамлакатда 800 миллион ишчининг ўртача реал иш ҳақи бор-йўғи икки йил ичида жами 1,5 триллион долларга камайди.
Тадқиқот муаллифлари дунёдаги энг бадавлат беш киши сифатида Илон Маск (Tesla), Бернард Арно (Louis Vuitton Moet Hennessy), Жефф Безос (Amazon), Ларри Эллисон (Oracle) ва Марк Цукерберг (Меtа)ни санади. Улардан бири биринчи триллионерга айланиши мумкин. Ўн йиллик бошидан буён уларнинг бойлиги жами 464 миллиард долларга, яъни 114 фоизга ошган.
“Энг бой 1 фоиз қатлам дунё молиявий активларининг 59 фоизига, жумладан акциялар, компания акциялари ва қимматли қоғозларга эгалик қилади”, — деб таъкидлайди Тhе Guardian.
Изоҳ (0)