1994 йилда Amazon компаниясига асос солган Жефф Безос узоқ йиллар давомида дунёнинг энг бадавлат инсонлари рўйхатида юқори поғоналарни эгаллаб келмоқда.
Бугунги кунда унинг давлати 195 миллиард долларга етган. Бундан ташқари, у АҚШда кўплаб кўчмас мулкларга эгалик қилади. Яқинда Жефф Безос яна бир бор катта харидни амалга оширди. Миллиардер Манхеттендан премиум сифатли янги кўп қаватли уйларни сотиб олди.
Жефф Безоснинг янги квартираси Манхеттеннинг қоқ марказида, 5-авенюда жойлашган. Ушбу ҳудуддаги уйлар узоқ вақтдан бери ўта қиммат нархда бўлиб келган. Тадбиркор мазкур хонадонларни сотиб олиш учун 96 миллион доллар сарфлади.
Тўртта йирик квартира кўп қаватли бинонинг энг юқори қисмида жойлашган. Уларнинг ҳар бири тўрт қаватдан иборат бўлиб, майдони 1800 квадрат метрни ташкил қилади.
Терраса
Жефф Безосга тегишли янги квартираларнинг ўзига хос хусусиятларидан бири бу хонадонлардаги улкан террасалар ва балконларнинг мавжудлигидир. Улар уйни тўрт томондан ўраб туради. Террасалардаги стол, диван ва ўриндиқлар очиқ осмон остида жойлашган.
Террасалар Нью Йоркнинг машҳур биноларига қараган: бир томонда Empire State Building, бошқа тарафдан эса Манхеттеннинг таниқли осмонўпар биноларини кўришингиз мумкин.
Интерер
Жефф Безоснинг янги апартаментида 15 та ётоқхона мавжуд. Хоналар минимализм ва art deco услубидаги дизайнга эга. Ҳар бир хона ажойиб ранглардаги мебеллар билан жиҳозланган.
Хоналарда кулранг ва оқ рангларга кўпроқ урғу берилган ва қора декоратив элементлардан фойдаланилган.
Квартираларнинг ажралиб турадиган яна бир хусусиятларидан бири — панорамали кенг деразалардир.
Изоҳ (0)