Amazon асосчиси, пулининг катта қисмини хайрия ишларига сарфлашга ваъда берган Жефф Безос LVMH бош директори Бернард Арнодан ўзиб, яна дунёнинг энг бой одамлари рейтингида иккинчи ўринга кўтарилди. Йил бошидан буён тадбиркорнинг бойлиги 49,3 миллиард долларга ошиб, 156 миллиард долларга етди.
Цирк артисти оиласида туғилган
Бўлажак миллиардер Жеффри Престон Ёргенсен 1964 йил 12 январда Албукерке (Нью-Мексико)да 17 ёшли Жаклин Гиз ва циркда велосипед билан трюклар кўрсатадиган 19 ёшли Теодор Ёргенсен оиласида туғилади. Кўп ўтмай, ота-онаси ажрашиб кетади ва онаси кичик Мигел Безосга турмушга чиқади. Мигел болага ўз фамилиясини беради. Биологик отаси эса Жеффрининг тақдири билан қизиқмайди ҳам. У ўғли миллиардер бўлганини Amazon асосчиси ҳақида биографик китоб ёзмоқчи бўлиб, уни қидириб келган журналистдан билади.
МcDonald’s да ишлаган
16 ёшли ўсмирлик даврида Безос таътил пайтида McDonalds’да ярим кунлик сменада ишлаган — у тез буюртмалар қаторида туриб бургер тайёрлаган. Жеффри бизнесдаги биринчи тажрибасини шу ерда ўрганади — у ўзининг қиз дўсти билан биргаликда ўрта мактаб ўқувчилари учун Dream Institute деб номланган ёзги ўқув лагерини ташкил қилади. Ёш бизнесменлар ёзги лагердаги олтита палатканинг ҳар биридан 600 доллар ишлаб топишади.
Amazon’га гаражида асос солган
Amazon’нинг тарихи веб-сайтнинг ишга туширилиши билан бошланади. Безос 300 га яқин дўстлари ва уларнинг танишларини бета-тестга жалб қилади. Шу билан бирга, дастлаб Cадабра деб номланган онлайн китоб савдоси хизматининг биринчи офиси ҳам ёш тадбиркорнинг гаражида жойлашган эди. Айтишларича, биринчи иш столлари пулни тежаш учун ёғоч эшикларнинг кесилган ва михланган қисмларидан қилинган. Компания ишини йўлга қўйиб олгач, электроника, кийим-кечак, ўйинлар ва дастурий таъминот сотишни кенгайтиради ва ўзини дунёдаги энг чуқур дарё — Amazon номи билан атайди.
Лос-Анжелесдаги энг қиммат уйни сотиб олган
2020 йил бошида Безос Калифорниянинг Беверли-Хиллз шаҳридан уй сотиб олади. Уй учун продюсер ва Геффен Recordс овоз ёзиш студияси асосчиси Девид Геффенга 165 миллион доллар тўлайди. Ушбу транзакция суммаси Лос-Анжелесдаги кўчмас мулк бўйича рекордга айланади. Ҳашаматли уй 1930 йилларда Warner Broс. кинокомпанияси президенти Жек Уорнер учун қурилган. Кўчмас мулк 9 акр (тахминан 3,6 гектар)да жойлашган бўлиб, 8 та ётоқхонага қўшимча равишда катта боғ, гольф майдони, теннис корти ва бир нечта меҳмонларга мўлжалланган уйлари ўз ичига олади.
Вертолёт ҳалокатидан омон қолган
2003 йилнинг март ойида Безос ва яна бир неча киши Техас жануби-ғарбий қисмида вертолёт ҳалокатида ҳалок бўлишига оз қолган. Кучли шамол натижасида вертолёт учувчиси бошқарувни йўқотган, шундан сўнг вертолёт дарахтларга урилиб, оқимга қулаган. Деярли барча йўловчилар кичик жароҳатлар олган, бироқ Безоснинг адвокати Элизабет Коррел умуртқа поғонасидан жароҳатланиб, касалхонага ётқизилган. Шундан кейин тадбиркор вертолётлардан узоқроқ юришга ҳаракат қилишини айтади, чунки улар “қўзғалмас қанотли самолётлар каби ишончли эмас”.
“Самовий йўл” фильмида рол ўйнаган
2016 йилда Безос “Самовий йўл” фильмида эпизодик рол ўйнайди. Тадбиркор болалигидан мазкур фильмнинг ашаддий мухлиси бўлган, шунинг учун илмий-фантастик франшизанинг 13-тўлиқ метражли фильмида иштирок этишни рад этмаган. Таниб бўлмас даражада грим қилинган Безос бир неча сония давомида экранда ўзга сайёралик юлдуз флоти офицери сифатида пайдо бўлади ва фақат битта “Рост гапир” жумласини айтади. Аммо суратга олиш майдончасида Amazon асосчиси ҳақиқий юлдузга айланади. “Президентнинг шахсан ўзи ташриф буюраётгандек бўлганди”, дейди фильм режиссёри Жастин Лин.
Космосга учган
2021 йил июль ойида Жефф Безос ўзининг Blue Origin аэрокосмик компанияси томонидан қурилган New Шепард кемасида коинотга учади. Тадбиркорга уч киши ҳамроҳ бўлган: унинг укаси Марк, 82 ёшли профессионал учувчи Уолли Фанк ва голландиялик миллиардер Жос Даменнинг ўғли 18 ёшли Оливер Дамен. Натижада бирданига учта жаҳон рекорди ўрнатилади: сайёрадаги энг бой одам, шунингдек, дунёдаги энг кекса ва энг ёш космонавт космосга учади. Ўн дақиқадан сал кўпроқ давом этган парвоз вақтида уч киши бўлган капсула 107 км баландликка кўтарилиб, максимал тезлиги 3595 км/соатга етади.
Изоҳ (0)