Президент Шавкат Мирзиёев Паркент туманидаги интенсив боғда сархил мевалар ҳосилини кўздан кечирди. Бу ҳақда Президент матбуот хизмати хабар берди.
“Meridian Темпо” корхонасига қарашли ушбу 54 гектар боғда гилос, олма, нок ва малинанинг экспортбоп навлари экилган. Кўчатлар Франция ва Испаниядан келтирилган. Дарахтлар ўзини ўзи чанглатиш хусусиятига эга. Бу ҳосилдорлик юқори бўлишида муҳим ўрин тутади.
Замонавий агротехнологик тизимлар орқали боғда тўлиқ томчилатиб суғориш жорий этилган. Аввал сув махсус ҳавзада тўпланади ва табиий нишаблик орқали суғорилади. Бунга энергия сарфланмай, натижада харажат ва маҳсулот таннархи камаяди. Шунингдек, боғда қуёш панеллари ўрнатилган.
Пишиб етилган мевалар экспортга йўналтирилмоқда. Бу йил 256 тонна гилос, 500 тонна олма, 480 тонна нок, 30 тонна малина етиштириши мўлжалланган. Энг муҳими, бундан келадиган даромад бошқа анъанавий ўсимликларга нисбатан бир неча баробар юқори.
Давлат раҳбари мутасаддиларга бу усулни оммалаштириш, меваларни парваришлаш ва қадоқлаш бўйича чет эл тажрибасини жорий этиш юзасидан кўрсатмалар берди.
Изоҳ (0)