Президент Тошкент шаҳри ва вилоят марказларида бирорта ҳоким бўш жойларни топиб, яшил ҳудуд, одамлар тоза ҳавога чиқиб ўтирадиган жойлар, спорт майдончалари, фаввораларни кўпайтиришни ўйламаётганини танқид қилди.
16 июндаги видеоселектор йиғилишида давлат раҳбари бор спорт майдончалари ва болалар ўйингоҳлари, уйлар орасидаги яшил ҳудудлар қурилиш учун бериб юборилаётганидан одамлар норози эканини айтди
Мисол учун, барча кўп қаватли уйларга туташ ҳудудларни бошқарув компанияларига бириктириб бериш бўйича топшириқ берилган. Лекин Тошкент шаҳри ҳокимининг 5 майдаги қарори билан 9 802 та кўп қаватли уйларнинг фақатгина бино остидаги ерлари кадастр билан бириктирилган.
“Мақсади битта – қолган ерларни қурилиш қилиш учун тадбиркорларга сотиш! Қани топшириқ назорати? Қани қонуннинг кучи?”, деди президент.
Бош прокурор ўринбосари Салом Самадовга, адлия вазири Акбар Тошқуловга “Ўзбеккосмос” ва Кадастр агентлиги билан биргаликда қайси ҳудудда “яшил” ҳудуд, спорт майдончаси, болалар ўйингоҳи бошқа мақсадлар учун бериб юборилган бўлса, ҳаммасини аниқлаб, жойига қайтариш топширилди.
Кўп қаватли уйларга туташ ҳудудларни бошқарув компанияларига бериш бўйича ҳокимларнинг қарорларини ўрганиб, қонунга зидларини бекор қилиш вазифаси қўйилди.
Йиғилишда бандлик режасини тўлиқ бажарилмаган 15 та туман ҳокими уч ойда режага чиқмаса, ишдан олиниши ҳақида огоҳлантирилди. Халқ қабулхоналарининг барча ходимлари ишдан бўшатилиб, масалани ҳал қила оладиган фидойи кадрлар билан тўлдирилиши айтилди. Давлат раҳбари суюлтирилган газ етказишдаги муаммо бўйича раҳбарларга сўнгги огоҳлантириш берди. Шавкат Мирзиёев ҳоким, вазирлар топшириқ кутмасдан, ўзи ташаббус кўрсатиб ишлашга ўтиши шартлигини ҳам қайд этиб ўтди.
Изоҳ (0)