Бандлик режасини тўлиқ бажармаган 15 та туман ҳокими уч ойда режага чиқмаса, ишдан олиниши мумкин. Бу ҳақда 16 июнь куни Шавкат Мирзиёев раислигидаги видеоселектор йиғилишида маълум қилинди.
Йиғилишда қайд этилишича, биринчи ярим йилликда 2 миллион 600 минг аҳолини банд қилиш, 722 минг одамни камбағалликдан чиқариш режа қилинган. Лекин маблағ ва шароит бўлса-да, бандлик режаси 15 та туманда тўлиқ бажарилмаган.
Булар – Муборак, Бўстон, Вобкент, Марҳамат, Фарғона, Зангиота, Дўстлик, Чортоқ, Қораўзак, Уйчи, Хонобод, Янгибозор, Паркент, Арнасой ва Учкўприк туманлари. Ушбу туман ҳокимлари уч ойда режага чиқмаса, барчаси ишдан олиниши қайд этилди.
Аҳолини камбағалликдан чиқариш бўйича Учқудуқ, Ангрен ва Карманада ишлар сустлиги кўрсатиб ўтилди.
Йиғилишда Халқ қабулхоналарининг барча ходимлари ишдан бўшатилиб, масалани ҳал қила оладиган фидойи кадрлар билан тўлдирилиши ҳам айтилди. Давлат раҳбари суюлтирилган газ етказишдаги муаммо бўйича раҳбарларга сўнгги огоҳлантириш берди. “Бу масалага икки ҳафтада ечим топсин, бўлмаса ўзи билиб жойини бўшатиб қўйсин”, деди президент.
Шавкат Мирзиёев ҳоким, вазирлар топшириқ кутмасдан, ўзи ташаббус кўрсатиб ишлашга ўтиши шартлигини ҳам қайд этиб ўтди.
Изоҳ (0)