Жиззахда илонни тириклай еган фуқаро жаримага тортилди

Жиззах вилояти Зомин туманида илонни тириклай еган фуқаро жаримага тортилди. Бу ҳақда вилоят Экология бошқармаси хабар берди.

Маълум қилинишича, ижтимой тармоқларда кулвор илонни тириклай еган фуқаро ҳақида видео тарқалганди. Жиззах вилояти Экология бошқармаси Зомин тумани бўлими ва ИИБ ходимлари ҳамкорлигида бу борада ўрганиш ишлари олиб борилди ва ҳолат фуқаро Қ.Ҳ. томонидан содир этилгани аниқланди.

Фуқаро бу ҳаракати билан “Ҳайвонот дунёсини муҳофаза қилиш ва ундан фойдаланиш тўғрисида”ги қонуннинг 4, 30, 51, 53-моддалари талабларини бузган.

Давлат инспекторлари томонидан унга нисбатан Маъмурий жавобгарлик тўғрисидаги кодекснинг 90-моддаси (ов қилиш ва балиқ овлаш қоидаларини, шунингдек ҳайвонот дунёсидан фойдаланишнинг бошқа турларини амалга ошириш қоидаларини бузиш) 1-қисми билан БҲМнинг 20 баравари (7,5 миллион сўм) миқдорида жарима қўлланилди.

Шунингдек, табиатга 1 125 000 сўм миқдорида зарар етказилган деб топилди.

2024 йилнинг декабрида Самарқанддаги боғча ва мактабларда болалар хавфсизлигига зид равишда илон томошалари ўтказилгани аниқланганди. Томошаларда фойдаланилган мазкур йўлбарс питони Халқаро Қизил китобга киритилган. Узунлиги 2,78 метр эни 28 сантиметр бўлган ушбу жонзот Ўзбекистонга ноқонуний йўл билан олиб кирилган.