Hindistonning g‘arbiy Maxarashtra shtatidagi mashhur sayyohlik maskanida daryo ustidagi temir ko‘prik qulashi oqibatida kamida 2 kishi halok bo‘ldi, yana 32 kishi jarohat oldi. Bu haqda CNN xabar berdi.
Kamida 6 kishi qutqarilgan va og‘ir ahvolda shifoxonaga yotqizilgan. Hodisa so‘nggi bir necha kun ichida kuchli yomg‘irlar kuzatilgan Puna tumanidagi Kundamala hududida sodir bo‘lgan.
Ko‘prik piknikchilar ko‘p bo‘ladigan hududda qulab tushganda yomg‘ir yog‘mayotgan edi, deb xabar berilgan. Politsiya Tabiiy ofatlarni bartaraf etish milliy kuchlari va boshqa qidiruv-tiklash bo‘linmalari guruhlari qutqaruv ishlarini olib borganini ma’lum qilgan.
Oldinroq Hindiston shimoli-sharqida so‘nggi bir necha kun ichida kuchli yomg‘ir, suv toshqini va ko‘chkilar oqibatida kamida 30 kishi halok bo‘lgani, minglab odamlar jarohatlangani haqida xabar berilgandi.
Hindiston armiyasi Sikkim shtatidagi harbiy lagerini ko‘chki bosishi oqibatida 2 askar va bir nafar yuk tashuvchi halok bo‘lgani, 6 askar bedarak yo‘qolganini ma’lum qilgan. Bedarak yo‘qolgan olti kishini qutqarish ishlari olib borilgan. Shuningdek, Assam, Arunchal Pradesh, Meghalaya va Mizoram shtatlarida ham qurbonlar qayd etilgandi. Assam shtatida jami 17 ta tuman suv toshqinidan zarar ko‘rgan. 364 mingdan ortiq odam jarohatlanib, ular uchun 52 ta yordam lagerlari tashkil etilgandi.
Manipur shtatida esa armiya poytaxt Imphal bo‘ylab keng ko‘lamli qutqaruv ishlarini davom ettirib, kuchli botqoqlangan hududlardan 500 dan ortiq tinch aholini evakuatsiya qilgandi. Rasmiylar Arunchal-Pradeshda ko‘chkilar va suv toshqinlari oqibatida 10 kishi, Assamda esa 8 kishi halok bo‘lganini aytgandi.
Izoh (0)