Америка Қўшма Штатлари президенти Дональд Трамп маъмурияти 11 июнь куни “олтин карта” учун аризаларни веб-сайтда қабул қилаётганини маълум қилди. Бу ҳақда Al Jazeera хабар берди.
Карта 5 миллион доллар эвазига АҚШда доимий яшаш ҳуқуқини беради. TrumpCard.gov сайтига ташриф буюрувчилардан кириш очилиши билан хабардор бўлиш учун исм, минтақа ва электрон почта манзилини тақдим этиш ва жисмоний шахс ёки бизнес сифатида ариза беришни кўрсатиши сўралади.
“Минглаб одамлар қўнғироқ қилиб, энг буюк мамлакат ва бозорга кириш учун қандай рўйхатдан ўтиш мумкинлигини сўрашди”, деди Трамп Truth Social’да.
Трамп резидентлик визасини илк маротаба февраль ойида таклиф қилган эди. Унинг маъмурияти бадавлат даъвогарларга яшаш ва ишлаш ҳуқуқини, шунингдек, фуқароликка йўл очадиган “олтин карта” таклиф қилишини айтган.
“Улар бой ва муваффақиятли бўлади, кўп пул сарфлайди, кўп солиқ тўлайди ва кўп одамларни иш билан таъминлайди”, деганди Трамп.
Апрель ойида Трамп Аir Forcе Оnе бортида журналистларга виза намунасини — унинг қиёфаси тасвирланган олтин рангли картани кўрсатганди. Трамп маъмурияти расмийлари карта АҚШга камида 1,05 миллион доллар сармоя киритган муҳожирларга доимий яшаш ҳуқуқини берувчи EB-5 иммиграцион инвестор визаси дастури ўрнини босишини билдирган.
Изоҳ (0)